გიორგი შაქარაშვილის საქმეზე დაკავებული ერთ-ერთი არასრულწლოვანი ყვება, თუ ტოიოტა ქამრიდან ვინ გაეკიდა ფეხბურთელს ხიდის ქვეშ. როგორც ტელეკომპანია შაბათის ფორმულას მიერ გასაჯაროებულ ჩვენებაშია აღნიშნული, შაქარაშვილს ხიდის ქვეშ გაეკიდნენ არჩილ გაგნიძე, ვახტანგ ჩიქოვანი და არასრულწლოვანი ა.ქ.

"მდინარე არაგვის პირას გზაზე დავინახეთ ოთხი პირი, ვახო ჩიქოვანმა დაიძახა ესენი არიან, ვინც მცემესო და ვასოს [მახარაძეს] მანქანა გააჩერებინა. ყველანი გადმოვედით, ჩვენს დანახვაზე ბიჭები გაიქცნენ, გავეკიდეთ. ჩემი მეგობრებო ეძახდნენ, რომ გაჩერებულიყვნენ და აგინებდნენ. წინ გავრბოდით მე და ა.ქ. უკან მოგვყვებოდნენ დანარჩენები. ოთხივემ გადაჭრა გზა, დავინახე უკვე როგორ გარბოდა სამი პირი. ერთი საით წავიდა, ვერ დავინახე. სამივეს გავყევით მე და ა.ქ. სამივემ, ვისაც მივსდევდით, მაგისტრალიდან ხიდის ბოლოში გაუხვიეს, მარჯვნივ ვიწროასფალტიან გზაზე, სადაც ერთი გზის პირას მდებარე ჯიხურთან გაუჩინარდა, მეორე ოდნავ მის ქვემოთ არსებულ ბუჩქებში დაიმალა, ხოლო მესამემ, რომელსაც "შორტი" ეცვა, ვიწროსაავტომობილო გზაზე ჩაირბინა, რომელიც ხიდის ქვეშ გადიოდა. რამდენიმე წამში მოირბინა ვახო ჩიქოვანმა, ვასომ, ნიკუშამ [რეხვიაშვილმა] და აჩიკომ [გაგნიძემ]. ვახომ იკითხა თუ საით ისინი, ვისაც მივსდევდით, ვუთხარი საითაც. ამის მერე გვითხრა, მოგვეყვანა მანქანა. ამის მერე მანქანის მოსაყვანად წავედით მე, ვასო და ნიკუშა. ხოლო ადგილზე დარჩნენ ა.ქ. ვახტანგ ჩიქოვანი და აჩიკო, რომლებმაც ჩაირბინეს ხიდის ქვეშ, რა მიმართულებითაც გაიქცა ის ერთ-ერტი ბიჭი", — ნათქვამია ჩვენებაში.

ფორმულას ინფორმაციით, სწორედ ამ სამმა პირმა სცემა გიორგი შაქარაშვილი შემდეგ კი წყალში გადააგდო. თუმცა ჩვენებაში არასრულწლოვანი აღნიშნავს, რომ მათ ფეხბურთელი ვერ იპოვეს. ამასთან, დაკავებული არასრულწლოვანი გურამ ამირხანაშვილთან შეხვედრაზეც საუბრობს.

"მივედით იმ ადგილას, სადაც ცოტა ხნის წინ მივსდევდით ზემოთ ხსენებულ სამ პირს. აღნიშნულ ადგილას დამხვდნენ ვახო ჩიქოვანი, ა.ქ., აჩიკო და მათთან ერთად იყო უკვე ვიღაც ჩემთვის უცნობი პიროვნება, რომელიც, როგორც გავიგე იყო იმ ოთხიდან, ვისაც ჩვენ გავეკიდეთ და დაიმალა ბუჩქებში. ის ყოფილა გურამ ამირხანაშვილი, რომელსაც ჩხუბში მონაწილეობა არ მიუღია და ტყუილად მივსდევდით. ხოლო ის პიროვნება, რომელიც გარბოდა ხიდის ქვეშ, ჩიქოვანისგან გავიგე ასფალტიან ვიწრო გზაზე ხიდის ქვეშ ბოლომდე იყო ჩასული და ვერსად ვერ ნახა. ამის შემდეგ ამირხანაშვილს შევთავაზეთ ტბილისში წაყვანა, რაზეც დაგვთანხმდა. გურამმა მითხრა, რომ მასთან ერთად, ვინც გარბოდა ერთ-ერთი იყო მისი მეგობარი გიორგი, მაგრამ გვარი არ უთქვამს. ჩვენ შევთავაზეთ მოეძებნა თავისი მეგობარი და მასთან ერთად წავიყვანდით თბილისში, რაზეც გვითხრა, რომ არ მოძებნიდა და გამოგვყვებოდა თბილისში".

გიორგი შაქარაშვილის საქმე

19 წლის ფეხბურთელი, გიორგი შაქარაშვილი 19 ივნისს დაიკარგა. დადგინდა, რომ ის მცხეთაში, დაბადების დღეზე იმყოფებოდა, სადაც ახალგაზრდებს შორის დაპირისპირება მოხდა. ამის შემდეგ ერთმა ჯგუფმა თბილისიდან "დახმარება გამოიძახა". შაქარაშვილი და კიდევ 5 ადამიანი აგარაკიდან მათ მოსვლამდე წამოვიდა. პროკურატურის მიერ გავრცელებულ კადრებში ჩანს, რომ უკვე არაგვის ხიდთან მყოფ ახალგაზრდებს მანქანიდან გადმოსული ადამიანები თავს დაესხნენ, რის შემდეგაც შაქარაშვილი და მასთან ერთად მყოფი პირები გაიქცნენ. ფეხბურთელის კვალი აქედან იკარგება, მასთან ერთად მყოფი 5 ადამიანი კი თბილისში ცალ-ცალკე, სხვადასხვა დროს დაბრუნდა.

4-დღიანი ძებნის შემდეგ, 22 ივნისს, გიორგი შაქარაშვილი ცხედარი მდინარე არაგვში იპოვეს. რამდენიმე დღეში საქმეზე 17 ადამიანი დააკავეს, ყველა მათგან წინასწარი პატიმრობა აქვს შეფარდებული. თავდაპირველად, მათ ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვთ წარდგენილი. როგორც ექსპერტიზის დასკვნის შემდეგ უწყებაში განაცხადეს, საქმეზე კვალიფიკაცია დაზუსტდა და ამ საქმეზე გამოძიება დამამძიმებელ გარემოებებში ჯგუფურად განხორციელებული განზრახ მკვლელობის მუხლით გაგრძელდება.

სწორედ ექსპერტიზის შემდეგ ცნობილი გახდა, რომ გიორგი შაქარაშვილის სიკვდილის მიზეზი, გახდა ასფიქსია წყალში დახრჩობით. ამავე დასკვნის მიხედვით, გარდაცვალებამდე მას მკვრივი-ბლაგვი საგნით მიყენებული დაზიანებები აქვს.