საქართველოს კულტურისა და ძეგლთა დაცვის სამინისტროსა და ევროკავშირის ეგიდით, თბილისში, საერთაშორისო ფორუმი მიმდინარეობს. კულტურა და შემოქმედებითობა ინოვაციისა და განვითარებისათვის - ფორუმზე განიხილავენ ისეთ საკითხებს, როგორიცაა: შემოქმედებითი ინდუსტრიის განვითარება რეგიონული თანამშრომლობის გზით; კონკურენტუნარიანობისა და ინოვაციურობის უნარების გაძლიერება კულტურისა და შემოქმედებითობის გამოყენებით.

კონფერენციაზე ბევრ ქართველ და უცხოელ მომხსენებელს შორის იქნებიან ევროკომისიის განათლებისა და კულტურის გენერალური დირექტორატის კულტურისა და კრეატიულობის განყოფილების ხელმძღვანელი, ევროპის აღმოსავლეთ პარტნიორობის კულტურისა და კრეატიულობის პროგრამის ხელმძღვანელი და ევროპის სხვადასხვა ქვეყნის კულტურის სფეროს მუშაკები.

ფორუმის ფარგლებში, ევროკავშირისა და აღმოსავლეთ პარტნიორობის ქვეყნების წარმომადგენლები ორი დღის მანძილზე, 8 და 9 დეკემბერს, ერთმანეთს გაუზიარებენ სექტორის განვითარების ძირითად ტენდენციებსა და წარმატებულ გამოცდილებას. მოეწყობა პრეზენტაციები, სემინარები და დისკუსიები ისეთ თემებზე, როგორიცაა განათლების და ახალი ტექნოლოგიების როლი კულტურისა და შემოქმედებითი ინდუსტრიების განვითარებაში, ადგილობრივი და რეგიონული პოლიტიკის განვითარების ინიციატივები და სხვ.

ღონისძიება საქართველოს კულტურის მინისტრმა, მიხეილ გიორგაძემ გახსნა. მისი თქმით, ამ სფეროს დიდი პერსპექტივა აქვს და ეკონომიკის განვითარებაშიც შეიტანს წვლილს:

"ფორუმი მიმართული არის, პირველ რიგში საზოგადოების ცნობიერების ამაღლებაზე, შემოქმედებითი ინდუსტრიების პოტენციალზე და როლზე ქვეყნის ეკონომიკურ განვითარებაში და, რა თქმა უნდა, თავად ამ სფეროს განვითარებაზე."

ფორუმის მონაწილეებს სიტყვით მიმართეს განათლების მინისტრმა ალექსანდრე ჯეჯელავამ, საქართველოს ეკონომიკისა და მდგრადი განვითარების მინისტრის მოადგილემ ქეთევან ბოჭორიშვილმა, თბილისის მერის მოადგილემ ირაკლი ლექვინაძემ და ევროკავშირის ელჩმა საქართველოში იანუშ ჰერმანმა. მათ შემოქმედებითი ინდუსტრიების პოტენციალს გაუსვეს ხაზი სფეროს პერსპექტივებზე ისაუბრეს.

ფორუმის ფარგლებში იგეგმება აზერბაიჯანის, სომხეთის, უკრაინის, მოლდოვას, ბელარუსისა და საქართველოს დელეგაციათა ხელმძღვანელების მიერ, აღმოსავლეთ პარტნიორობის რეგიონში შემოქმედებითი ინდუსტრიების განვითარების თბილისის მანიფესტის მიღება, რაც ხელს შეუწყობს აღმოსავლეთ პარტნიორობის 6 ქვეყანას შორის რეგიონულ თანამშრომლობას.