დაავადებათა კონტროლის ეროვნული ცენტრის დირექტორის მოადგილის, პაატა იმნაძის ინფორმაციით, წელს სეზონური გრიპით გარდაცვალების 4 დადასტურებული შემთხვევა იყო. ამის შესახებ მან ტრადიციულ პრესკონფერენციაზე განაცხადა, სადაც ხათუნა ზახაშვილი, ამირან გამყრელიძე და პაატა იმნაძე მედიის კითხვებს პასუხობენ.

"სამწუხაროდ, იყო 4 დადასტურებული შემთხვევა. გაცილებით მძიმე იყო შარშანდელი სეზონი, როცა გვქონდა 42 დადასტურებული შემთხვევა", — თქვა იმნაძემ.

ამასთან, ამირან გამყრელიძემ განმარტა, რომ დადასტურებული შემთხვევა ნიშნავს ლაბორატორიულად დადასტურებულ გარდაცვალების შემთხვევას და კლინიკურად გრიპით გარდაცვალების ფაქტი, სავარაუდოდ, მეტი იქნება.

"აღსანიშნავია, რომ საკმაოდ კარგად ჩაიარა ვაქცინაციის კამპანიამ სეზონის დაწყებამდე. გარდა ამისა, ვაქცინისთვის სულ უფრო მეტი ადამიანი მიმართავს კერძო სექტორს და იტარებენ იმუნიზაციას. ალბათ, ამ კულტურის დანერგვასა და განვითარებასთან ერთად, გრიპით ავადობის ტვირთი წლიდან წლამდე უფრო შეღავათიანი იქნება ქვეყნისთვის", — აღნიშნა ხათუნა ზახაშვილმა.