საქართველოს მართლმადიდებელი ეკლესიის პატრიარქის თანამოსაყდრის, მეუფე შიოს თქმით, ილია მეორე თანამედროვე ქართული ეკლესიის "ყველაზე მძლავრი ლოდია". ამის შესახებ მან სამების ტაძარში პეტრე-პავლობის დღესასწაულთან დაკავშირებით ქადაგებისას განაცხადა. სასულიერო პირის ქადაგებას საზოგადოებრივი მაუწყებელი ავრცელებს.

როგორც პატრიარქის თანამოსაყდრე ამბობს, ილია მეორემ პანდემიის პერიოდში "ჭეშმარიტება" კიდევ ერთხელ დაამოწმა.

"ჩვენ ერთობით უნდა მივულოცოთ დღევანდელი დღე ჩვენს მამასა და მეუფეს, სრულიად საქართველოს კათოლიკოს-პატრიარქ ილია მეორეს, ვინაიდან იგი არის თანამედროვე ქართული ეკლესიის მშენებლობის მთავარი, ყველაზე მძლავრი ლოდი, დიდი წინამძღოლი.

მისი მოღვაწეობიდან ჩანს, რაოდენ უხვი და მადლმოსილია. თუნდაც ბოლო მოვლენების ჟამს, პანდემიის პერიოდში გამოჩნდა, რომ მისი წინამძღოლობით საქართველოს ეკლესიამ დაამოწმა მთელი მსოფლიოს წინაშე ჭეშმარიტება და ჭეშმარიტი დამოკიდებულება ამ მოვლენისადმი, დიდი სულიერი ამოცანისადმი, რომელიც მთელი ერის წინაშე იდგა", — განაცხადა მეუფე შიომ.