პრემიერმინისტრ გიორგი გახარიას განცხადებით, იმ ადამიანებს, რომლებმაც წლების წინ ელექტრონული აუქციონით სახელმწიფოსგან იჯარით მიიღეს მიწები და ამუშავებდნენ, შეეძლებათ ეს მიწები კომერციულ ფასად იყიდონ. როგორც გახარიამ მთავრობის სხდომაზე აღნიშნა, ეს ადამიანები წლების განმავლობაში პირნათლად ასრულებდნენ პირობებს.

"ბევრი მოთხოვნა მოდიოდა რეგიონში ვიზიტების დროს და მთავრობამ მიიღო გადაწყვეტილება, ადამიანები, რომლებიც პირნათლად, წლების განმავლობაში ასრულებდნენ საიჯარო პირობებს სახელმწიფოს წინაშე, კომერციულ ფასად, მაგრამ პირდაპირი მიყიდვის წესით, იმ მიწას, რომელსაც წლების განმავლობაში ამუშავებდნენ და რომლებზეც ხშირ შემთხვევაში მრავალწლიანი კულტურები მოჰყავთ, სახელმწიფოსგან მიიღებენ საკუთრებაში. ეს იქნება პირდაპირი მიყიდის ფორმით, რა თქმა უნდა საბაზრო ფასით, მაგრამ იმ ღვაწლის დაფასებით, რომლითაც ეს ადამიანები წლების განმავლობაში ამ მიწაზე შრომით უფიქსირებდნენ და ახორციელებდნენ", — თქვა გახარიამ.

მან ასევე აღნიშნა, რომ ეს ამ ადამიანებს მისცემს საშუალებას უფრო გააფართოონ თავიანთი ბიზნესი, უფრო მეტი ფინანსური რესურსი მიიღონ საბანკო სექტორიდან და დაასაქმონ კიდევ უფრო მეტი ადამიანი.