სერბეთში საპროტესტო აქცია გაიმართა, რა დროსაც დემონსტრანტები პარლამენტში შეიჭრნენ. მოქალაქეებმა პარლამენტთან შეკრება მას შემდეგ დაიწყეს, რაც პრეზიდენტმა ალექსანდრ ვუჩიჩმა განაცხდა, რომ კორონავირუსის შემთხვევების ზრდის გამო კომენდანტის საათს შემოიღებდნენ.

ფოტო: AP

ფოტო: AP

საპროტესტო აქცია 7 ივლისს საღამოს დაიწყო, 10 საათისთვის კი დემონსტრანტების მცირე ნაწილი პარლამენტში მცირე ხნით შეიჭრა. საკანონმდებლო ორგანოდან ისინი პოლიციამ გამოიყვანა.

დემონსტრანტების წინააღმდეგ პოლიცია ცრემლსადენ გაზსა და რეზინის ხელკეტებს იყენებდა, ხოლო დემონსტრანტები პოლიციის მიმართულებით ქვებს ისროდნენ.

ბელგრადის პოლიციის უფროსის, ვლადიმირ რებიჩის თქმით, შეტაკების დროს სულ მცირე 60 ადამიანი დაშავდა, მათგან 43 სამართალდამცავი. 23 ადამიანი დააკავეს.

აქციის მონაწილეები პრეზიდენტი ვუჩიჩის გადადგომას მოითხოვდნენ. ღამის ორი საათისთვის კი აქცია დაიშალა.

ფოტო: AP

ფოტო: AP

კორონავირუსის გამო შემოღებული მკაცრი ზომები სერბეთში ორი თვის გაუქმდა. ამის შემდეგ ქვეყანაში შემთხვევის ზრდა დაიწყო, რის გამოც ხელისუფლებამ გადაწვიტა უქმეებზე 24-საათიანი კომენდანტის საათი შემოეღო. ამასთან, უცნობია კომენდანტის საათი მხოლოდ ბელგრადში იმოქმედებს, თუ მთელ ქვეყანაში.

ოპონენტებს მიაჩნიათ, რომ საკარანტინო ზომები ადრე მოიხსნა და ეს საპარლამენტო არჩევნებისთვის გაკეთდა, რომელიც 21 ივნისს გაიმართა და ვუჩიჩის პარტიამ გაიმარჯვა.