2017 წლის 26 თებერვალს ამერიკის კინოაკადემია 89-ედ გასცემს ყველა მსახიობისათვის სასურველ ჯილდოს - ოსკარს.

როგორც აკადემიის ოფიციალური გვერდი იუწყება, დოლბის თეატრში შეკრებილ ვარსკვლავებს ამერიკელი ტელეწამყვანი ჯიმი კიმელი მიესალმება.

არჩევანი კიმელზე ტელეარხ ABC-ის რეკომენდაციით შეჩერდა, რომელსაც დაჯილდოების ტრანსლირების უფლება 2028 წლამდე $75 მილიონად აქვს ნაყიდი.

2016 წლის მონაცემებით ღონისძიების აუდიტორიამ წინა წლებთან შედარებით იკლო. არხის წარმომადგენლები იმედოვნებენ, რომ სწორედ ჯიმი იქნება ის, ვინც შეძლებს მაყურებელს ოსკარისადმი ინტერესი დაუბრუნოს.

ჯიმი კიმელი 2003 წლიდან ტელეარხ ABC-ის სახეა და საღამოს კომედიურ შოუს - Jimmy Kimmel Live!-ს უძღვება.