ევროპული საქართველოს ერთ-ერთი ლიდერი, გიგა ბოკერია აცხადებს, რომ საზოგადოებრივი მაუწყებლის სამეურვეო საბჭოს წევრად არჩეული ბონდო მძინარაშვილი ღიად პროპუტინური პროპაგანდის გამტარებელია. ამ თემაზე კომენტარი მან მთავარ არხთან გააკეთა.

"როდესაც ესეთ ფიგურას, რომელიც არის ღიად პროპუტინური პროპაგანდის გამტარებელია ჩვენს ქვეყანაში, ჩვენი ქვეყნის თავისუფლების და ჩვენი ქვეყნის შიდა პერსონალური თავისუფლების ღია მოწინააღმდეგეს აძლევ ხმას ამით ახდენ ლუსტრაციას. კიდევ ერთ ტესტში დაუდასტურეს საზოგადოებას სად დგას ივანიშვილის გუნი ამ საკითხებთან დაკავშირებით", — თქვა გიგა ბოკერიამ.

დეპუტატის თქმით, როცა ქართული ოცნება მომავალში იტყვის, რომ რუსულ პროპაგანდას ებრძვის უნდა ახსოვდეს მათი ნაბიჯები.

პარლამენტმა საზოგადოებრივი მაუწყებლის სამეურვეო საბჭოს წევრებად: ბონდო მძინარაშვილი, გია მურღულია და ზაზა აბაშიძე დაამტკიცა. ბორდის წევრობის კიდევ ერთმა კანდიდატმა, დოდო შონავამ კი ხმების საკმარისი რაოდენობა ვერ მოიპოვა, მას მხარი 44-მა დეპუტატმა დაუჭირა.

რაც შეეხება გია მურღულიას კანდიდატურას, ის უმრავლესობის მიერ იყო წარდგენილი და მხარი 92-მა დეპუტატმა დაუჭირა, ბონდო მძინარაშვილი და ზაზა აბაშიძე კი უმრავლესობის გარეთ მყოფმა პარლამენტის წევრებმა წარადგინეს. მძინარაშვილის კანდიდატურას 95 მხარდამჭერი ჰყავდა, აბაშიძეს კი 98.