ნაციონალური მოძრაობის დეპუტატი, რომან გოცირიძე მმართველი გუნდის მიერ ფეიკნიუსების საკითხზე გააქტიურებულ საუბარს გამოეხმაურა და პრემიერმინისტრს, ფეიკბიუჯეტის ავტორი უწოდა.

"თუ დავაკვირდებით, ქართული ოცნების დეპუტატებმა, ამ ორი დღის განმავლობაში, ისწავლეს მოდური სიტყვა — ფეიკნიუსი და ფეიკობენ და ფეიკობენ ორი დღეა.

ბატონო გიორგი, თქვენ ბრძანდებით ყველაზე დიდი ფეიკბიუჯეტის ავტორი. სიცრუის ბიუჯეტი წარმოადგინეთ გუშინწინ, რომელიც დღეს უკვე ფაქტობრივად მკვდარია", — განაცხადა მან.

გოცირიძემ განაცხადა, რომ გახარიამ პანდემიის შედეგად დაზარალებული 600 000-მდე ადამიანის მხარდაჭერის პირობა დადო, თუმცა დრო გავიდა და შედეგი მხოლოდ ის არის, რომ გახარიამ "400 000-იანი ფეიკი გამოაცხო".

"400 000 ადამიანი დატოვეთ დახმარების გარეშე. მხოლოდ 100 000-მდე თვითდასაქმებულს აქვს დახმარება მიღებული იმიტომ, რომ გაურთულეთ პროცედურები და გააწამეთ ეს ადამიანები სხვადასხვანაირი ცნობების მოთხოვნით და ასევე, უმუშევრად დარჩენილი დასაქმებულების მხოლოდ მესამედი იღებს დახმარებას. სულ მცირე 300 მილიონის ეკონომია გააკეთეთ, აი, ამ ფეიკდაპირებებისა და ტყუილი ბიუჯეტის წყალობით", - განაცხადა მან.