პატრიოტთა ალიანსის წევრის, ადა მარშანიას მტკიცებით, 2019 წლის 20 ივნისს პარლამენტის თავმჯდომარის სკამში რუსი კომუნისტი დეპუტატის, სერგეი გავრილოვის დაბრუნებას კი არა, ევროპული საქართველოს წევრის, ელენე ხოშტარიას "უსასტიკესი" და "უკადრებელი" განცხადებებისთვის ხელისშეშლას ცდილობდა.

მარშანიას თქმით, ხოშტარია ამ განცხადებებს რუსულ ენაზე "ყვიროდა" და "კიდევ კარგი", რომ მედიით არ გავრცელდა.

"ერთი კვირა რომ ატრიალებნენ თქვენი საკუთარი კომპანიები მარშანია ავიდა ოკუპანტისთვის სავარძლის გასათავისუფლებლადო. მე ძალიან სასტიკი და მძიმე მიზეზი მქონდა, რომ პრეზიდიუმში ავვარდი იმ დღეს. ქალბატონი ხოშტარია უკადრებელ, უმძიმეს განცხადებას ყვიროდა რუსულ ენაზე, რომელსაც მე ვერ გავიმეორებ, იმიტომ, რომ არ მინდა ჩემს ქვეყანას ზიანი მივაყენო. მადლობა ღმერთს, რომ ეს მისი რუსული ყვირილები მასმედიაში არ მოხვდა", — განაცხადა მარშანიამ.

ფოტო: IPN

მას შემდეგ, რაც 2019 წლის 20 ივნისს მართლმადიდებელი ქვეყნების საპარლამენტთაშორისო ასამბლეის ეგიდით თბილისში ჩამოსული რუსი კომუნისტი დეპუტატი, საქართველოს პარლამენტის თავმჯდომარის სკამში აღმოჩნდა, ელენე ხოშტარიამ პროტესტის ნიშნად სხდომათა დარბაზში საქართველოს დროშით შეიჭრა და სკამი დაიკავა. ხოშტარიას ზურგი ჯერ თანაგუნდელებმა, შემდეგ კი ნაციონალური მოძრაობის დეპუტატებმა გაუმაგრეს.

პარლამენტში ჩოჩქოლი ატყდა. პატრიოტთა ალიანსის დეპუტატები, მათ შორის ადა მარშანია, ოპოზიციას გავრილოვის "შეურაცხყოფის" გამო ლანძღავდნენ. მარშანია ცდილობდა, რომ პარლამენტის თავმჯდომარის სკამი თავად დაეკავებინა და ოპოზიციის წევრებისათვის არ დაეთმო.