საქართველოს მთავრობის განცხადებით, გართულებული ეპიდემიოლოგიური მდგომარეობიდან გამომდინარე, ისრაელთან ტურიზმის მყისიერად გახსნის შესაძლებლობა, ამ ეტაპზე, გადავადდა.

9 ივნისს პრემიერმინისტრმა გიორგი გახარიამ სხვადასხვა უწყებასთან საერთაშორისო ტურიზმის გახსნისთვის კონკრეტული კრიტერიუმები განიხილა. მთავრობის ადმინისტრაციის ინფორმაციით, აქტიურად გრძელდება მოლაპარაკებები საერთაშორისო დონეზე ე.წ. უსაფრთხო მიმართულებების იდენტიფიცირების კუთხით.

მათივე განცხადებით, ევროკავშირის შიგნით ჯერ ისევ გრძელდება მსჯელობა, მათ შორის მესამე ქვეყნებთან, ტურიზმის გახსნის თაობაზე.

მთავრობის წევრების განცხადებით, შექმნილი გლობალური პანდემიის ფონზე, განსაკუთრებული პრიორიტეტი ენიჭება შიდა ტურიზმს, რომელიც 15 ივნისიდან იხსნება და თითოეული მოქალაქის მხრიდან შიდა ტურიზმის ხელშეწყობას ქვეყნის ეკონომიკისა და სექტორისთვის ძალიან დიდი მნიშვნელობა აქვს.