პარლამენტის დამოუკიდებელი დეპუტატი, ეკა ბესელია რეგლამენტში დაგეგმილ ცვლილებებს უარყოფითად აფასებს და მოუწოდებს კოლეგა დეპუტატებს, არ მიიღონ კანონპროექტი. მისი შეფასებით, რეგლამენტის ცვლილებები სცდება კონსტიტუციის ფარგლებს. ამის შესახებ ბესელიამ დღეს, 8 ივნისს პარლამენტში გამართულ ბრიფინგზე განაცხადა:

"აშკარად ჩანს, რომ პარლამენტში ოპოზიციის როლის სუსტდება ამ ცვლილებებით და ასევე, აქ ამ დასუსტებულ ნაწილში კიდევ უფრო მკვეთრად ჩანს დამოუკიდებელი დეპუტატების როლის შესრულება, მათი როლის დაკნინება. უმრავლესობას ვურჩევ, როდესაც ის ცდილობს ოპოზიციის დასუსტებას და უმრავლესობის კიდევ უფრო მეტად გაძლიერებას, იფიქრონ იმაზე რომ თვითონ აღმოჩნდებიან ოპოზიციის როლში. ნებისმიერ დემოკრატიულ ქვეყანაში პარლამენტის სიძლიერე გადის ოპოზიციური და უმცირესობის ჯგუფების უფლებების დაცვაზე".

საქართველოს პარლამენტის რეგლამენტში დაგეგმილი ცვლილებები ასევე უარყოფითად შაფასა საერთაშორისო გამჭვირვალობა-საქართველომ. მათივე განცხადებით, კანონპრექტი ოპოზიციის უფლებრივ მდგომარეობას აუარესებს. ცვლილებებს შორისაა ისიც, რომ სხვადასხვა პოლიტიკური პარტიის ან/და საარჩევნო ბლოკის წარდგენით არჩეული დეპუტატები საერთო ფრაქციას ვეღარ შექმნიან და ფრაქციის ფორმირებას ვერც დამოუკიდებელი მაჟორიტარები და პარლამენტის დამოუკიდებელი წევრები შეძლებენ.