პარტია გირჩის ლიდერის, ზურა ჯაფარიძის განცხადებით, ერთი და იგივე ადამიანების ქორწინების დაკანონებას და მათი ოჯახების მიერ შვილების აყვანას მხარს უჭერს. ის პარტია ლელოს წევრების განცხადებებს სოცილურ ქსელში გამოეხმაურა.

"ის ბოდვა ჩანაწერი ამოსაშლელია კონსტიტუციიდან. ქორწინებაში ვგულისხმობ ურთიერთობის სამოქალაქო რეგისტრაციას; რელიგიური რიტუალი კონკრეტული კონფესიის საქმეა. ზოგადად, ვთვლი, რომ სახელმწიფოს საქმე საერთოდ არ არის ვინ ვისთან ერთად ქმნის ოჯახს, მაგრამ თუ ასეთი (რეგისტრაციის) უფლება არსებობს, საიდანაც შემდეგ სხვა უფლებები გამომდინარეობს, ის უნდა არსებობდეს ყველასთვის, განურჩევლად ნებისმიერი ნიშნისა", — წერს ჯაფარიძე.

მისი თქმით, ლელოს გარდა სხვა პარტიებსაც იდენტური ან ოდნავ ბუნდოვანი პოზიცია აქვთ ამ საკითხთან მიმართებაში, რადგან ხალხის რისხვის და ხმების დაკარგვის ეშინიათ.

რამდენიმე დღის წინ, პარტია ლელო საქართველოსთვის ლიდერმა, მამუკა ხაზარაძემ განაცხადა, რომ საქართველოში ლგბტ თემის უფლებები "ძალიან კარგადაა" დაცული და ისე არ უნდა მოხდეს, რომ უმცირესობამ უმრავლესობის უფლებები შელახოს. ამ თემაზე მან TV პირველის ეთერში ისაუბრა.

პოლიტიკოსმა ჟურნალისტის კითხვას, რას ფიქრობს ლგბტ თემისთვის ქორწინებისა და შვილად აყვანის უფლების მინიჭებაზე, უპასუხა, რომ სჯერა შვილი დედამ და მამამ უნდა აღზარდოს.

ამავე თემაზე პარტიის ერთ-ერთმა ლიდერმა, დავით უსუფაშვილმა განაცხადა, რომ ლელო ერთი და იგივე სქესის ადამიანებს შორის ქორწინებას მხარს არ უჭერს.