სოციალ-დემოკრატების წევრი, გია ჟორჟოლიანი ფასიანი პოლიტიკური რეკლამის გაუქმებასა და პარტიებისთვის თანაბარი უფასო საეთერო დროის დათმობას ითხოვს. შესაბამისი კანონპროექტის ცვლილება მან პარლამენტში დაარეგისტრირა.

"კანონპროექტის მიზანია ფასიანი პოლიტიკური რეკლამის გაუქმება და არჩევნებზე რეგისტრირებული ყველა პოლიტიკური პარტიისთვის თანაბარი უფასო საეთერო დროის გამოყოფა. ეს ხელს შეუწყობს არჩევნების კონკურენტულ და თანაბარ პირობებში წარმართვას", — თქვა გია ჟორჟოლიანმა.

ჟორჟოლიანის თქმით, საჭიროა პოლიტიკის გახსნა, ახალი პარტიების და ხედვის ჩართვა და არა მუდმივად ქართული ოცნებისა და ნაციონალური მოძრაობის კინკლაობის ყურება. დეპუტატმა აღნიშნა, რომ არჩევნებს ფულის კი არა პარტიის პროგრამა უნდა წყვეტდეს.