ნაციონალური მოძრაობის დეპუტატი, რომან გოცირიძე აცხადებს, რომ თეა წულუკიანის საარჩევნო სიაში ლიდერობა ოპოზიციისთვის საჩუქარი იქნება. ამ თემაზე მან კომენტარი TV პირველის ეთერში გააკეთა.

"წულუკიანი საარჩევნო სიის თავში — ეს არის კარგი საჩუქარი ოპოზიციისთვის, ძალიან გაგვიხარდება, 10%-იანი ფორა გვქნება თუნდაც ამ ერთი დანიშვნის გამო", — თქვა რომან გოცირიძემ.

გოცირიძის თქმით, წულუკიანის ხისტი განცხადებები არავის მოსწონს და ეს პარტიისთვის მოგების შანსებს შეამცირებს. დღეს, პირველ ივნისს, მთავრობის ბრიფინგზე წულუკიანმა კითხვას, იქნება თუ არა ქართული ოცნების საარჩევნო სიის სათავეში, უპასუხა, რომ მოვლენებს უნდა დაველოდოთ.

"სია თუ არა, პარლამენტი თუ არა, დაველოდოთ მოვლენების განვითარებას და ყველანი დავინახავთ ვინ სად დადგება იმ საარჩევნო კამპანიაში, რომელი ჩვენ ყველას გვაქვს წინ", — განაცხადა წულუკიანმა.

პარლამენტში ვიზიტის დროს, დეპუტატმა გიგა ბოკერიამ, პრემიერს კითხვით მიმართა, მოხსნიდა თუ არა თეა წულუკიანს მინისტრის პოსტიდან იმის გამო, რომ პარტნიორების კრიტიკას მტრული სახელმწიფოს ოკუპაციას ადარებს, რაზეც გახარიამ უპასუხა, რომ წულუკიანს "დააწინაურებს".