თბილისის სასულიერო აკადემიისა და სემინარიის სამეცნიერო საბჭომ საქართველოს მართლმადიდებელი ეკლესიის პატრიარქს, ილია მეორეს საპატიო დოქტორის წოდება მიანიჭა. ამის შესახებ ინფორმაციას სასწავლებელი ავრცელებს.

მათივე ცნობით, აღნიშნული წინადადება 29 მაისს გამართულ საბჭოს სხდომაზე პროტოპრესვიტერმა გიორგი ზვიადაძემ წამოაყენა, რომელიც ასევე, აღნიშნული სასწავლებლის რექტორიცაა. მათი ინფორმაციით, ზვიადაძის წინადადებას, საბჭო ერთხმად დაეთანხმა.

"29 მაისს, საქართველოს მართლმადიდებელი ეკლესიის საპატრიარქოს ყოფილი რეზიდენციის ეზოში გაიმართა თბილისის სასულიერო აკადემიისა და სემინარიის სამეცნიერო საბჭოს სხდომა, რომელსაც თავმჯდომარეობდა სასწავლებლის რექტორი, თეოლოგიისა და ფილოლოგიის დოქტორი, პროფესორი, პროტოპრესვიტერი გიორგი ზვიადაძე. იგი სამეცნიერო საბჭოს წევრთა წინაშე წარდგა წინადადებით - დაემტკიცებინათ საპატიო დოქტორის მინიჭების წესი და ამ წოდების მისანიჭებლად წარედგინათ სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი, უწმინდესი და უნეტარესი ილია II. საბჭო ერთხმად დაეთანხმა რექტორის ინიციატივას", — ნათქვამია სასწავლებლის მიერ გავრცელებულ ინფორმაციაში.