დაავადებათა კონტროლის ეროვნული ცენტრის ერთ-ერთი ხელმძღვანელი, ხათუნა ზახაშვილი ამბობს, რომ საზოგადოებრივი ტრანსპორტის ამუშავებისას, მოქალაქეებმა პირბადის ტარებაზე ან არასწორად ტარებაზე ერთმანეთი უნდა აკონტროლონ:

"ყველაზე დიდი სანქცია უნდა იყოს ჩვენი ურთიერთკონტროლი, როდესაც საზოგადოებრივ ტრანსპორტში ვართ. ალბათ, უნდა გადავლახოთ ბარიერი, როცა გვერიდებოდა სხვისთვის შენიშვნის მიცემა მაშინ როცა ვინმეს არ უკეთია ნიღაბი, ან არასწორად უკეთია".

ამირან გამყრელიძის თქმით, უნდა გაითავისოს ყველამ, რომ სანქციები აუცილებელი არ არის ყოველთვის, არამედ, უნდა ვისწავლოთ კორონავირუსთან ერთად თანაცხოვრება:

"მე არ გამოვრიცხავ, რომ არ აგიშვან ავტობუსში, ან არ ჩაგიშვან მეტროში, ალბათ, ეს იქნება სანქცია".

29 მაისიდან საზოგადოებრივი ტრანსპორტი მეტროს ჩათლით ამუშავდება. თბილისის მერის, კახა კალაძის თქმით, აუცილებელია, მგზავრობისას ყველას ეკეთოს პირბადე.