სერიალ Game of Thrones-ის ორი ცნობილი სახე — ჯეისონ მომოა და პიტერ დინკლიჯი მაყურებლებბმა, შესაძლოა, ახალ ფილმში კვლავ ერთად იხილონ.

Variety-ის ცნობით, ამ ორ ცნობილ მსახიობთან აქტიური მოლაპარაკებები მიმდინარეობს, რათა ფილმში Good Bad & Undead მიიღონ მონაწილეობა. ეს მომავალი კინოპროექტი კარგად ნაცნობი თემატიკის — ვამპირების შესახებ იქნება.

ფილმის მწარმოებელი კინოსტუდია Legendary პიტერ დინკლიჯს ვამპირებზე მონადირის როლს სთავაზობს, ჯეისონ მომოა მოლაპარაკებების წარმატებით დასრულების შემთხვევაში კი ვამპირის როლში მოგვევლინება.

სცენარის მიხედვით, ფილმი სწორედ ამ ორი პერსონაჟის მოულოდნელი მეგობრობისა და მრავალი ხიფათით სავსე თავგადასავლის შესახებ მოგვითხრობს.

პიტერ დინკლიჯი HBO-ს სერიალში Game of Thrones ტირიონ ლანისტერის როლს ასრულებდა, რის გამოც ემის ოთხი ჯილდო მიიღო. ჯეისონ მომოა კი ხალ დროგოს განასახიერებდა, მალე კი მას დენის ვილნევის ფილმში Dune ვიხილავთ.

Good Bad & Undead-ს რეჟისორი მაქს ბარბაკოუ გადაიღებს, თუმცა ჯერჯერობით ნაადრევია ფილმის პრემიერაზე საუბარი, რადგან ჯერ გადაღებებიც კი არ დაწყებულა.