100 წლის კაპიტანი ტომ მური კორონავირუსის წინააღმდეგ ბრძოლისთვის და გაწეული დახმარებისთვის დიდი ბრიტანეთის პრემიერმინისტრმა ბორის ჯონსონმა რაინდის წოდებით დააჯილდოვა. ახალ ტიტულზე თანხმობა განაცხადა დედოფალმა ელიზაბეტმაც.

მეორე მსოფლიო ომის ვეტერანმა ბრიტანეთის ეროვნული ჯანდაცვის სისტემის დასახმარებლად 40 მილიონ დოლარზე მეტი შეაგროვა. ტომ მურს 100 წელი 30 აპრილს შეუსრულდა და ამ დღეს პოლკოვნიკის ტიტულიც მიიღო.

"მან მთელი ქვეყანა შთააგონა, ის ნამდვილი ეროვნული საგანძურია", — განაცხადა ჯონსონმა მურის შესახებ.

ტომმა დაბადების დღემდე თითქმით ერთი თვით ადრე გადაწყვიტა დიდი იუბილეს აღსანიშნავად პანდემიის დაძლევაში შეეტანა წვლილი და საქველმოქმედო მიზნებისთვის თანხა შეეგროვებინა.

მან საკუთარი თავი ეზოში დამოუკიდებლად სეირნობაში გამოიწვია: თუ ამ დავალებას წარმატებით გაართმევდა თავს და დაამტკიცებდა, რომ თავს კვლავ მხნედ გრძნობს, მაშინ სურვილის შემთხვევაში სხვებს საქველმოქმედო ფონდში თანხა უნდა გადაერიცხათ.

ტომის მიზანი 100 გირვანქა სტერლინგის შეგროვება იყო, თუმცა საბოლოო თანხამ ათეულობით მილიონი შეადგინა.

ჯანდაცვის სისტემის თანამშრომლებმა და ბრიტანელმა ვარსკვლავმა, მაიკლ ბოლმა მასთან ერთად ცნობილი სიმღერის, You Will Never Walk Alone-ის (შენ არასდროს ივლი მარტო) ქავერი ჩაწერეს, რომელმაც აპრილში დიდი ბრიტანეთის სინგლების ჩარტში პირველი ადგილი დაიკავა.