თბილისის მერია ბარათაშვილისა და ქეთევან წამებულის ქუჩის რეაბილიტაციას იწყებს. ამის შესახებ თბილისის მერმა, კახა კალაძემ თბილისის მთავრობის სხდომაზე ისაუბრა.

კალაძის თქმით, პირველ შემთხვევაში რეაბილიტაცია ბარათაშვილის ხიდიდან ორბელიანის მოედნამდე განხორციელდება.

"ამ პროექტის ფარგლებში მთლიანად იქნება ასფალტის საფარი შეცვლილი, ტროტუარები იქნება მოწესრიგებული, ასევე, ელექტროგადამცემი ხაზები მიწის ქვემოთ ჩავა ახალი ბოძები დადგება განათების, თავისი ლედ სანათებით", — თქვა კახა კალაძემ.

მერმა აღნიშნა, რომ ქეთევან წამებულის ქუჩის სრულ რეაბილიტაციის ტენდერში გამარჯვებულ კომპანიასთან ხელშეკრულებას უახლოეს მომავალში გააფორმებენ. სარეაბილიტაციო არეალი მეტრო ავლაბრიდან კაჩინსკის ქუჩამდე იქნება.

"საჭიროა საკანალიზაციო ქსელის მოწესრიგება, ახალი წყლის სისტემის ჩადება მიწის ქვემოთ, გაზის კომპანია იმუშავებს ქსელის განახლებაზე, [...] მთლიანად მოწესრიგებული იქნება ტროტუარები, ახალი განათების ბოძები იქნება დამონტაჟებული თავისი ლედ სანათებით", — თქვა კალაძემ.

მერის განცხადებით, ქეთევან წამებულის ქუჩის რეაბილიტაციის სამუშაოები დაახლოებით 13 მილიონი ლარი დაჯდება.