პარტია ახალი საქართველოს ლიდერი, გიორგი ვაშაძე 2020 წლის არჩევნებისთვის გეგმავს, მაჟორიტარად იყაროს კენჭი. ამის შესახებ მან დღეს, 18 მაისს ლეიბორისტული პარტიის ოფისში ოპოზიციის შეხვედრის ბოლოს განაცხადა. ვაშაძე აზუსტებს, რომ სავარაუდოდ, თბილისში იყრის კენჭს.

"1-2 კვირის ფარგლებში ყველა ჩამოყალიბდება, მონაწილეობს თუ არა მაჟორიტარული ოლქების შეთანხმებაში. მე პირადად ვაპირებ მაჟორიტარობასაც, სავარაუდოდ, თბილისში. პროპორციულ ნაწილში ცალ-ცალკე ვიქნებით. ახალი საქართველოს გუნდი იქნება გაერთიანებული ოპოზიციის ფორმატით, სადაც ნაციონალური მოძრაობა და სხვა პარტიებიცაა".

18 მაისის შეხვედრაზე ოპოზიციურმამ პარტიებმა განცხადება გაავრცელეს, სადაც ამბობენ, რომ საქართველოს დემოკრატიზაციის გზაზე ერთმანეთთან კოორდინირებულად მოქმედება აქვთ გადაწყვეტილი.

მათი თქმით, პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, 8 მარტის შეთანხმების შესრულებისკენ და საქართველოში პოლიტიკური სიტუაციის ნორმალიზაციისკენ მნიშვნელოვანი ნაბიჯია.

ოპოზიციის წევრები იმედს გამოთქვამენ, რომ საპატიმროს მალე დატოვებს გიორგი რურუაც და ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად.