თბილისის მერი, კახა კალაძე მთავარი არხის ინფორმაციას, რომ ჭავჭავაძის გამზირზე რეაბილიტაციის დროს სანიაღვრე ჭების მოწყობა დაავიწყდათ და ასფალტი ისევ აყარეს, გამოეხმაურა და თქვა, რომ ეს საზოგადოების შეცდომაში შეყვანის მცდელობა იყო.

კალაძის განმარტებით, ჭავჭავაძის გამზირზე 300-მდე საკომუნიკაციო ჭაა და ამ ჭების თავები რომ წამოწეული დაეტოვებინათ ავტომობილის მძღოლები გადაადგილებას ვერ შეძლებდნენ.

მისივე თქმით, ვინც ერკვევა ინფრასტრუქტურულ პროექტებში დაეთანხმება, რომ ამ სამუშაოების წარმოება ხდება მანამ, სანამ გზაზე ასფალტის ბოლო ფენა დაეგება და მერიაც ამ კრიტერიუმებს მივყვება.

"ეს არის საკომუნიკაციო ჭების თავების წამოწევა, რასაც კონკრეტული ტელევიზიის და კონკრეტული ადამიანების მხრიდან მოყვა მცდელობა, რომ საზოგადოება შეეყვანათ შეცდომაში. თუმცა,ამის შესაძლებლობას ჩვენ არავის არ მივცემთ და ისინი ისევ თავიანთ სიცრუეში და ტყუილში დარჩებიან, როგორც ყოველთვის ეს არის მათი ბუნებრივი ადგილი.

თქვენ როგორ წარმოგიდგენიათ, ეს ჭის თავები წამოწეული რომ დაგვეტოვებინა, როგორ მოახერხებდნენ ავტომობილები გადაადგილებას? ფაქტიურად, შეუძლებელი იქნებოდა და ეს სერიოზულ პრობლემას შეუქმნიდა ავტომობილის მძღოლებს გადაადგილებისთვის", — განაცხადა კალაძემ.