სარფის საბაჟოზე დაკავებულ ბრალდებულს კორონავირუსი დაუდასტურდა. პენიტენციური სამსახურის განმარტებით, ბრალდებული 24 აპრილს დააკავეს და მას შემდეგ სამოქალაქო სექტორის კლინიკაში იყო განთავსებული.

უწყებაში ამბობენ, რომ ბრალდებულის მდგომარეობა სტაბილურია. ამჟამად იგი საკარანტინო ნაწილშია და მას ე.წ. კოვიდის სამკურნალო კლინიკაში გადაიყვანენ.

პენიტენციურ სამსახურში ამბობენ, რომ ინფიცირებულ პაციენტს საკარანტინო ზონის ბოქსირებულ პალატებში განთავსებულ სხვა ახალდაკავებულებთან შეხება არ ჰქონია. ამასთან, ტესტირება ჩაუტარდება ყველას, ვინც ინფიცირებულთან კონტაქტში იყო.

StopCov-ის ვებგვერდზე აღნიშნულია, რომ კორონავირუსით ინფიცირების 639 შემთხვევაა დადასტურებული. ჯერჯერობით უცნობია ინფიცირებული ბრალდებული ახალი შემთხვევაა თუ უკვე არსებული დადასტურებული.

კორონავირუსის პანდემიის გავრცელების შემდეგ ბრალდებულებს არა საპატიმროში, არამედ სამოქალაქო სექტორის კლინიკაში ათავსებენ. ე.წ. მიმღებ ციხეებში ახლადმიყვანილი ბრალდებულები ციხის გარეთ სპეციალურად ამისათვის მოწყობილ დროებით სამედიცინო პუნქტში გადიან შემოწმებას, სიმპტომების გამოვლენის შემთხვევაში კი კლინიკაში გადაჰყავთ.

გარდა ამისა, ის ბრალდებულები, რომლებიც კარანტინის რეჟიმში მყოფ მუნიციპალიტეტებში არიან დაკავებულნი ან შემოსულები არიან უცხოეთიდან, პირდაპირ სამოქალაქო კლინიკაში თავსდებიან 17-დან 21 დღემდე პერიოდით. სწორედ ამ წესის მიხედვით განათავსეს 24 აპრილს დაკავებული პირი.