იმ ცნობილ სახეებს, რომლებიც პანდემიის დროს საქველმოქმედო ორგანიზაციების დახმარებას სხვადასხვა ხერხით ცდილობენ, ბრიტანელი მსახიობი ენდი სერკისიც შეუერთდა.

BBC-ის ცნობით, მსახიობი გეგმავს, რომ პირდაპირ ეთერში ჯ.რ.რ. ტოლკინის 1937 წელს გამოქვეყნებული საკულტო ფენტეზის ჟანრის წიგნი — ჰობიტი შეუჩერებლად წაიკითხოს.

ამ 56 წლის მსახიობს სურს, რომ სანამ თავად 10-12 საათის განმავლობაში ამ ზღაპრულ ისტორიას ყველასთვის წაიკითხავს, მანამდე სხვებმა ქველმოქმედებისთვის თანხა გაიღონ, რაც შემდგომ პანდემიისას განსაკუთრებული საჭიროების მქონე ჯგუფებს მოხმარდებათ.

"ბევრი ჩვენგანი იზოლაციაში იტანჯება, ამ მძიმე დროს კი მინდა ერთ-ერთ ყველაზე დიდებულ თავგადასავალში წაგიყვანოთ, რომლის შესახებაც ოდესმე დაწერილა: 12-საათიანი მარათონი შუამიწეთში. ამავდროულად კი შეგვიძლია თანხა გავიღოთ ორი არაჩვეულებრივი საქველმოქმედო ორგანიზაციის მხარდასაჭერად, რომლებიც ახლა მათ დახმარებას ცდილობენ, ვისაც ეს ყველაზე მეტად სჭირდებათ", — ამბობს მსახიობი ვიდეოში.

ენდი სერკისს მაყურებლების უმრავლესობა სწორედ ტოლკინის საკულტო წიგნების ბეჭდების მბრძანებლის ეკრანიზაციაში შესრულებული როლით იცნობენ: ის მითიურ არსება გოლუმს ასახიერებს.

ფოტო: New Line Cinema

ნებისმიერ მსურველს ენდი სერკისის მიერ წაკითხული ჰობიტის მოსმენა 8 მაისს შეეძლება. მსახიობს სურს, რომ ამ აქციით 100 ათასი გირვანქა სტერლინგი შეაგროვოს. ამჟამად £22,800-ზე მეტია შეგროვებული.

უფრო მეტი დეტალისთვის ეწვიეთ ვებსაიტს Go Fund Me.

ასევე იხილეთ: