პარლამენტში ქართული ოცნების ყოფილი დეპუტატი, დიმიტრი ცქიტიშვილი ამბობს, რომ კოკა ყანდიაშვილთან დაკავშირებით მისი კოლეგების განცხადებები უკვირს. როგორც მან ფორმულასთან საუბარში თქვა, ბოლო წლების განმავლობაში პარტიაში არაერთხელ ჰყავს ნანახი.

"კოკა ყანდიაშვილი არა თუ ნანახი მყავს, ალბათ პარტიის ოფისში გავიცანი. ზუსტად თარიღებსა და დეტალებს ვერ გავიხსენებ, როდის იყო ან პირველი ან ბოლო შეხვედრა. მაგრამ აქტიურობა პარტიაში დავიწყე 2013 წლის ბოლოდან და 2019 წლის ბოლომდე [ვიყავი]. ამ ექვსი წლის განმავლობაში არაერთხელ მყავს ნანახი და რამდენადაც ვიცი, ის იქ მუშაობდა, ცოტა მიკვირს ჩემი კოლეგების განცხადებები და კომენტარი", — ამბობს ცქიტიშვილი.

5 მაისს გამოქვეყნდა Facebook-ის ანგარიში, რომელშიც განმარტებული იყო, რომ კომპანიამ ნაციონალურ მოძრაობასთან და კოკა ყანდიაშვილის მედია ესპერსონასთან დაკავშირებული ფეისბუქგვერდები წაშალა. ფეისბუქის განცხადებით, გაუქმდა 80 გვერდი, 23 პირადი ანგარიში, 41 ჯგუფი და 9 ინსტაგრამანგარიში, რომელიც გამოძიებამ ენმ-სთან ასოცირებულ ინდივიდებთან დააკავშირა.

ამასთან ფეისბუქმა Espersona-სთან დაკავშირებული 511 გვერდი, 101 პერსონალური ანგარიში, 122 ჯგუფი და 56 ინსტაგრამანგარიში წაშალა. გამოცემა დაიბლოკა Facebook-ის მფლობელობაში მყოფი პლატფორმებიდან.

ესპერსონა კოკა ყანდიაშვილს ეკუთვნის. ის 2013 წლის აპრილიდან დეკემბრამდე საქართველოს მთავრობის კანცელარიაში საზოგადოებასთან ურთიერთობის დეპარტამენტს ხელმძღვანელობდა. ამის შემდეგ კი ქართული ოცნების მთავრობის კონსულტანტის პოზიციაზე გადავიდა საზოგადოებასთან ურთიერთობის საკითხებში. ფეისბუქმა ყანდიაშვილის პირადი პროფილიც წაშალა. გაუქმდა კოკა ყანდიაშვილის ცოლის, ნონა ყანდიაშვილის პირადი ანგარიშიც.

ქართულ ოცნებასთან კოკა ყანდიაშვილის კავშირს უარყოფენ მმართველ პარტიაში. ვიცე-სპიკერის, მამუკა მდინარაძის თქმით, პარტიასა და ყანდიაშვილს შორის ოფიციალური კავშირი არ აქვთ, თუმცა აღიარებს, რომ ის მათი აქტიური მხარდამჭერია.