პირველი საუნივერსიტეტო კლინიკის კლინიკური დირექტორი, ლალი ტურძელაძე ადასტურებს, რომ მათი კლინიკის ექიმი კორონავირუსით დაინფიცირდა.

მისი თქმით, მათ წესად არ აქვთ პაციენტების პროფესიის დასახელება და ეს საჭირო არაა, თუმცა, რადგან ინფიცირებული ექიმმა ეს ინფორმაცია გაასაჯაროვა, არც თავად აპირებს ამის უარყოფას.

"რადგან თვითონ ისურვა, რომ გამოეთქვა თავის თავზე აზრი და ეთქვა, რომ ის ინფიცირებულია, კი, ბატონო, ჩვენი ყველას ნებაა. მე არ შემიძლია ამის უარყოფა, არის, მოთავსებულია, ვმკურნალობთ, სტაბილურია მისი მდგომარეობა. მკურნალობს ეს ქალბატონი. ალბათ, მათი პროფესიების დასახელება, დამერწმუნეთ, საჭირო არ არის", — განაცხადა ტურძელაძემ პალიტრანიუსის ეთერში.

ტურძელაძემ უარყო ინფორმაცია, რომ პირველ საუნივერსიტეტო კლინიკაში შიდა გადაცემის ფაქტი დაფიქსირდა.

"საავადმყოფო მუშაობს და არცერთი თანამშრომელი, რომელიც ახლა კლინიკაში მუშაობს დაინფიცირებული არ არის, დამერწმუნეთ. ხატზე შემიძლია დავიფიცო. ყველას აქვს ტესტები გაკეთებული. საავადმყოფო მუშაობს მთელი დატვირთვით, მთელი მოცულობით", — განაცხადა ლალი ტურძელაძემ.