საქართველოს კომუნიკაციების ეროვნულ კომისიამ დააკმაყოფილა კომპანიების ერთობლივი მოთხოვნა და შპს მაგთიკომს მისცა წინასწარი თანხმობა, შეიძინოს შპს დელტა კომის 100 პროცენტი. კომპანიებმა ამ წინადადებით მარეგულირებელ კომისიას ოქტომბერში მიმართეს.

მარეგულირებელი კომისიის ინფორმაციით, ბაზრის კონკურენტული ანალიზის ჩატარების საფუძველზე კომისიამ შპს მაგთიკომის მიერ შპს დელტა კომის წილის 100 პროცენტის შეძენის შემთხვევაში, შპს დელტა კომს გარკვეული ვალდებულებები დაეკისრა. კერძოდ:

"ზონათშორის ოპტიკურ-ბოჭკოვან მაგისტრალურ არხებთან დაშვების მომსახურების, ადგილობრივ ზონაში ოპტიკურ-ბოჭკოვან მაგისტრალურ არხებთან დაშვების მომსახურების, ადგილობრივ ზონაში მაგისტრალური საკომუნიკაციო ციფრული სისტემების ტერმინალურ ელემენტებთან და მათ რესურსებთან დაშვების მომსახურების, ზონათშორის მაგისტრალური საკომუნიკაციო ციფრული სისტემების ტერმინალურ ელემენტებთან და მათ რესურსებთან დაშვების მომსახურებისა და ინტერნეტის გლობალურ რესურსებთან დაშვების საბითუმო ბაზრის შესაბამის სეგმენტებზე, ყველა იმ გეოგრაფიულ ზონაში, სადაც საქმიანობს, კომპანიას შემდეგი სპეციფიკური ვალდებულებები დააკისრა, რაც ელექტრონული საკომუნიკაციო ქსელის შესაბამის ელემენტებთან დაშვების, ინფორმაციის გამჭვირვალეობის უზრუნველყოფას და დისკრიმინაციის აკრძალვას ითვალისწინებს".

კომისიამ მიიჩნია, რომ ზემოაღნიშნული ვალდებულებების დაკისრების გათვალისწინებით შპს დელტა კომმის წილის 100 პროცენტის შპს მაგთიკომის მიერ შეძენაზე წინასწარი თანხმობის მიცემის დამაბრკოლებელი გარემოებები არ არსებობს.

მობილურმა ოპერატორმა მაგთიმ, ერთ-ერთი უმსხვილესი ინტერნეტპროვაიდერის, კავკასუს ონლაინის საცალო მომსახურების სერვისი 2016 წლის მაისში შეიძინა. დელტა კომი კი მისთვის მიმდინარე წელს მეორე ინტერნეტ პროვაიდერი იქნება, რომელსაც შეიძენს.