ინფექციური საავადმყოფოს დირექტორის, თენგიზ ცერცვაძის განცხადებით, არსებობს იმედი, რომ COVID-19-ის მკურნალობისთვის საქართველო გახდეს ერთ-ერთი პირველი ქვეყანა, რომელიც რემდესივირს მიიღებს.

როგორც ცერცვაძემ აღნიშნა, პრეპარატის მწარმოებელ კომპანია გილიადთან საქართველოს დიდი ხნის თანამშრომლობა აქვს, რადგან C ჰეპატიტის ელიმინაციის პროგრამისთვის მედიკამენტებს სწორედ ეს კომპანია აწვდის.

"ჩვენმა ხელმძღვანელობამ ისარგებლებს ამ პრივილეგიით და უშუალოდ მიმართეს კომპანიას, რომ გაითვალისწინო საქართველოსთან მისი წარმატებული ისტორია. არის იმედი, რომ საქართველოს იქნება ერთ-ერთი პირველი, რომელიც მიიღებს რემდესივირს. თუ გამართლდა ის იმედები, რომელიც დღეს არის და რომელიც დადო ენტონი ფაუჩიმ, მაშინ საქართველო კიდევ უფრო დიდ ნაბიჯს გადადგამს წინ", — აღნიშნა თენგიზ ცერცვაძემ.

აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელმა, ენტონი ფაუჩიმ განაცხადა, რომ რემდესივირმა ეფექტიანობა აჩვენა.

"მონაცემები აჩვენებს, რომ რემდესივირს გამოჯანმრთელების დროზე ცალსახა და შესამჩნევი დადებითი გავლენა აქვს", — ამბობს ის. მონცემები, რომელზეც ფაუჩი საუბრობს ფართომასშტაბიანი კვლევიდანაა, რომელიც მსოფლიოს მასშტაბით მიმდინარეობდა და რომელშიც 1 000-ზე მეტმა პაციენტმა მიიღო მონაწილეობა. კვლევის ფარგლებში კორონავირუსით ინფიირებულთა ნაწილი პლაცებოს იღებდა, ნაწილი კი რემდესივირს.

ფაუჩის განმარტრებით, "რემდესივირის ჯგუფში" შემავალი პაციენტები საავადმყოფოდან საშუალოდ 11 დღეში ეწერებოდნენ, პლაცებო ჯგუფის შემთხვევაში კი 15 დღეში.

"რაც დამტკიცებულია ის არის, რომ მედიკამენტს ვირუსის დაბლოკვა შეუძლია", — ამბობს ფაუჩი.

ჯერჯერობით აშშ-ის საკვებისა და მედიკამენტების ადმინისტრაციას (FDA) კორონავირუსის სამკურნალოდ არც ერთი მედიკამენტი არ დაუმტკიცებია. თუმცა, The New York Times-ის მიხედვით, FDA გეგმავს, რომ რემდესივირის გამოყენება გადაუდებელი საჭიროების ფორმით დაჩქარებულად დაუშვას.