ნიკა მელია მეცხრე მოწვევის პარლამენტში სიტყვით წარსდგა და განაცხადა, რომ ქართული ოცნება შეიძლება დღეს ზეიმობს გამარჯვებასა და კონსტიტუციურ უმრავლესობას, მაგრამ, მას ძალიან გაუჭირდება ქვეყნის მართვა მომავალი 4 წლის განმავლობაში.

მელიამ დასძინა, რომ არც არჩევნები და არც წინასაარჩევნო დემოკრატიული პრინციპებით არ წარმართულა. მან ასევე გააკრიტიკა პარლამენტის თავჯდომარის თანამდებობაზე ქართული ოცნების მიერ დასახელებული ირაკლი კობახიძე:

"როდესაც საუბარია პარლამენტის თავჯდომარის კანდიდატურაზე, რომელზეც თქვენ ბატონი [ირაკლი] კობახიძე დაასახელეთ, ყველაზე ნათლად წარმოაჩენს რბილად რომ ვთქვათ თქვენი გუნდის დეფექტს.

თქვენს რიგებშიც კი, ბატონი კობახიძე გამოირჩეოდა ყველაზე მეტი აგრესიულობით, ის ცდილობდა ურცხვად, ყველა ოპონენტზე მოეხდინა უზნეო და ამორალური იარლიყების მიწებება მთელი ამ უკანასკნელი დროის განმავლობაში და იყო საზოგადოების არა შემრიგებელი და გამაერთიანებელი, არამედ დაშორიშორების ხმაურიანი და აგრესიული რუპორი, და ამ ადამიანს ირჩევთ იმ ორგანოს თავჯდომარედ, სადაც საპირისპირო უნდა ხდებოდეს.

აქ უნდა ხდებოდეს აზრების და შეხედულებების გაცვლა-გამოცვლა და ამ დროს როდესაც თქვენ კობახიძეს წარმოადგენთ, უკვე გასაგებია, რა ატმოსფეროს შექმნა გინდათ დარბაზში".

მელიამ აღნიშნა, რომ ის და მისი თანაგუნდელები კობახიძესგან ბოდიშის მოხდას არ ელიან მათზე გავრცელებული სიცრუის გამო, თუმცა, მისი თქმით, მთავარი ისაა, რომ არც ქართული ოცნება ისურვებდა კობახიძის კანდიდატურას, "მათი ასარცევი რომ ყოფილიყო":

"საქმე იმაში კი არაა, რომ ბატონი კობახიძე ნულოვანი გამოცდილებისა და ავტორიტეტის მქონეა საქართველოს პოლიტიკურ წრეებსა და საერთაშორისო ასპარეზზე, ბოდიში გულწრფელობისთვის, საქმე იმაშია, რომ მართლა თქვენი ასარჩევი რომ ყოფილიყო, მას არ წარმოადგენდით პარლამენტის თავჯდომარის კანდიდატურაზე".

მელიას გამოსვლის შემდეგ, თავის მხრივ, ირაკლი კობახიძემ, პირობა დადო, რომ პარლამენტის თავმჯდომარის პოსტზე არჩევის შემთხვევაში, ყველაფერს გააკეთებს დეპუტატებს შორის მაქსიმალურად კონსტრუქციული ურთიერთობის უზრუნველსაყოფად.