ერთ-ერთი უკანასკნელი ბელგიელი, რომელიც ჰოლოკოსტს გადაურჩა, კორონავირუსით 94 წლის ასაკში გარდაიცვალა. მეორე მსოფლიო ომის დროს ჰენრი კიჩკა ოსვენციმის საკონცენტრაციო ბანაკში იყო და ე.წ. სიკვდილის მარში გადაიტანა.

მისმა შვილმა, მაიკლ კიჩკამ ფეისბუქზე დაწერა:

"პატარა მიკროსკოპულმა კორონავირუსმა წარმატებას მიაღწია იქ, სადაც დამარცხდა მთელი ნაცისტური არმია. მამაჩემი სიკვდილის მარშს გადაურჩა, თუმცა დღეს მისი ცხოვრების მარში დასრულდა".

ჰენრი კიჩკა 1926 წელს ბრიუსელში, პოლონური წარმოშობის ებრაულ ოჯახში დაიბადა. მისი მშობლები აღმოსავლეთში ანტისემიტიზმს გაექცნენ და დასავლეთში ახალი ცხოვრების დასაწყებად წავიდნენ.

მას შემდეგ რაც ნაცისტურმა გერმანიამ ბელგია აიღო, ოჯახს წასასვლელი არსად ჰქონდა და ისინი 1942 წელს დააკავეს.

ჰენრი კიჩკასა და მამამისს მონებად ამუშავებდნენ, ხოლო დედამისი, მისი და და დეიდა ოსვენციმში ჩასვლისთანავე გაზის კამერაში გაგუდეს და შემდეგ კრემაცია გაუკეთეს.