მიხეილ სააკაშვილის განცხადება, რომლის მიხედვითაც ამერიკის ელჩი მიხელ სააკაშვილისგან 2003 წლის 2 ნოემბრის არჩევნების შედეგების აღიარებას ითხოვდა, ტყუილია. განცხადებას ამის შესახებ აშშ-ის საელჩო ავრცელებს.

აშშ-ს საელჩოს განცხადების თანახმად, 2003 წლის 2 ნოემბრის არჩევნებზე, რომელიც გაყალბებულად ჩაითვალა და რომელსაც ავრდების რევოლუცია მოჰყვა, აშშ-ის სახელმწიფო დეპარტამენტის წარმომადგენელმა შეშფოთება გამოთქვა არჩევნების მეორე დღეს, 3 ნოემბერს და ასევე, უკმაყოფილება გამოხატა 19 ნოემბერს არჩევნების შედეგების გამოქვეყნებასთან ერთად. საელჩოს მტკიცებულებად 2003 წლის 21 ნოემბერს აშშ-ის მთავრობის მიერ გამოქვეყნებული ოფიციალური განცხადება მოჰყავს სადაც წერია:

"ამერიკის შეერთებული შტატები ძალიან იმედგაცრუებულია საქართველოში 2 ნოემბერს ჩატარებული საპარლამენტო არჩევნებით, რომელმაც ვერ გაამართლა საქართველოს მთავრობის მიერ აღებული ვალდებულება ეუთოსა და აშშ-ის წინაშე. ხმების დათვლის დაგვიანებამ და შედეგებით მანიპულირებამ გამოააშკარავა ცენტრალური საარჩევნო კომისიისა და საქართველოს მთავრობის მხრიდან ხალხის ნების უგულვებელყოფა."

საელჩო ასევე მიუთითებს 2003 წლის 13 ნოემბრის თარიღზე, როდესაც დუგლას დავიდსონმა, ეუთოში აშშ-ის მისიის ხელმძღვანელის მოადგილემ მოუწოდა „საქართველოს მთავრობას, რათა მათ უზრუნველეყოთ, რომ ხმის მიცემა ამჯერად ჩატარებულიყო საერთო საარჩევნო კოდექსის, საერთაშორისო და ეუთოს სტანდარტებთან შესაბამისობაში.“

მიხეილ სააკაშვილმა რუსთავი 2-ის ეთერში, გადაცემა არჩევანში ისაუბრა 2003 წლის 2 ნოემბრის არჩევნების შემდგომ აშშ-ს რეაქციაზე. სააკაშვილის თქმით, 2003 წელს ამერიკის ელჩი საქართველოში, რიჩარდ მაელსი მოუწოდებდა, რომ ეღიარებინათ პირველადი შედეგები, რომელშიც პირველ ადგილას ედუარდ შევარდნაძე იყო, მეორეზე კი ასლან აბაშიძე:

"ეხლა რომ იძახიან, რომ ამერიკელები და ისინი გვეუბნებიანო, რომ აღიარეთო, ჩვენ მაშინ არ გვეუბნებოდნენ?! რიჩარდ მაელსი, ამერიკის ელჩი მაშინდელი, რამდენიმე შეხვედრა მომიწყო ჯორბენაძესთან. დღემდე იმიტომ ვერ მიტანს და სულ ჩემს ლანძღვაშია ის კაცი, დიდი ხანია პენსიაზეა. და მეუბნებოდა პირდაპირ არ გვინდა ახლა არეულობა. ჩვენ ხო მესამე ადგილზე გადაგვიყვანეს, ისე გააყალბეს, რომ ჯერ დასვეს შევარდნაძე, მერე ასლანი და მერე ჩვენ. და მეუბნებოდა კარგი თქვენ გადმოგიყვანთ მეორე ადგილზე. მე ვეუბნებოდი, რას მელაპარაკები. რა მეორე ადგილზე, ჩვენ მოვიგეთ, პირველ ადგილზე ვართ, 30% ავიღეთ. მეორე ადგილზე მყოფმა აიღო მაქსიმუმ 21%. რა მეორე ადგილზე გადაგყავართ?! არა არ გვინდა ახლა არეულობა, საქართველო დაიშლება. უნდა აღიაროთ შედეგები პირველად უცხოელები მოგვიწოდებდნენ, რომ აღიარეთ შედეგებიო. მერე დავუჯერე, თუ რა?! ჩემი ქვეყანა იყო, რას ნიშნავს მეღიარებინა შედეგები?! მაშინ კიდე მეგობრები მყავდა თეთრ სახლში და დავურეკე და ვუთხარი, რას აკეთებს თქვენი ელჩი?! არ გრცხვენიათ?! რას ლაპარაკობთ, ამერიკა არ უნდა იყოს გაყალბების წინააღმდეგ, თუ რაზე ვლაპარაკობთ აქ და ნუ მიხვდნენ, რომ აღარ ვიხევთ უკან და მერე წამოჰყვა ეს ხალხი."