გირჩის წევრი ნინო დარსაველიძე ტელეკომპანია მაესტროს ეთერში სტუმრობისას აცხადებს, რომ ხელისუფლებამ მათ არ დაუტოვა სხვა გზა, გარდა სამოქალაქო დაუმორჩილებლობისა, სწორედ აქედან გამომდინარეობს პარტიის ინიციატივაც, რომლის მიხედვითაც, თუ ახალ წლამდე ნარკოპოლიტიკა არ შეიცვლება, გირჩის წევრები 31 დეკემბრის 23:59 წუთზე მარიხუანას საჯაროდ დარგავენ.

"ადამიანის თავისუფლება იწყება მისი სხეულიდან, როცა მას არ აძლევენ საშუალებას, თავად გადაწყვიტოს, რა უქნას საკუთარ სხეულს, ეს არის ინდივიდუალური თავისუფლების შეზღუდვის უმაღლესი ზომა, ეს არის რეპრესიები".

ნინო დარსაველიძის თქმით, გირჩის წევრებს გააზრებული აქვთ ის რისკი, რომლებზეც მიდიან:

"ჩვენ გათვითცნობიერებული გვაქვს ეს რისკი, სისხლის სამართლის კოდექსის 265-ე მუხლი, რომელიც გულისხმობს ამ მცენარის კულტივაციის გამო ადამიანის 4-დან 12 წლამდე ციხეში ჩასმას. ჩვენ ყველას გვყავს ოჯახი, ზოგს შვილები, სამეგობრო წრე, გვაქვს საყვარელი აქტივობები, თუმცა მივდივართ გათვითცნობიერებულ რისკზე, ჩვენ უკან არ დავიხევთ. იმედს ვიტოვებ, რომ ეს ზომა არ გახდება საჭირო და მეცხრე მოწვევის პარლამენტი თავის დაპირებას შეასრულებს".

გირჩის პოლიტსაბჭოს წევრი აცხადებს, რომ მათი გადაწყვეტილების მიზანია დღის წესრიგში რჩებოდეს ქვეყანაში არსებული ნარკოპოლიტიკის საკითხი:

"არანაირი ნარკოტიკი არ უნდა ისჯებოდეს, ამ შემთხვევაში მარიხუანა, იგივე კანაფი, არის უბრალოდ სიმბოლო, ჩვენ უბრალოდ ჰეროინის ვერ ვაწარმოებთ".

დღეს გირჩის ლიდერმა ზურაბ ჯაფარიძემ საგანგებო ბრიფინგზე პარტიის მოთხოვნა გააჟღერა და პარლამენტს ახალ წლამდე მისცა ვადა, შეცვალოს ნარკოტიკებთან დაკავშირებული კანონმდებლობა. გირჩი მოითხოვს, რომ ერთის მხრივ, მარიხუანას და მისგან დამზადებული პროდუქტების მოხმარება გახდეს სრულად ლეგალიზებული და მეორეს მხრივ, მარიხუანის კულტივირება და შენახვა, ასევე იყოს სრულად ლეგალიზებული.

დღეს On.ge-ს ჩატარებულ 4 საათიან Live გამოკითხვაში, როგორი უნდა იყოს სახელმწიფოს ნარკოპოლიტიკა მარიხუანასთან მიმართებაში, გამოკითხულთა უმრავლესობამ, ფეისბუკის 9 758-მა მომხმარებელმა, მხარი დაუჭირა მარიხუანის მოხმარების ლეგალიზებას.