რუსთავი 2-ის ინფორმაციით, უზენაესი სასამართლო რუსთავი 2-ის საჩივრებზე 21 ნოემბერს იმსჯელებს. მიუხედავად არხის იურისტების შუამდგომლობისა, სხდომას მხარეები არ დაესწრებიან, საკასაციო სასამართლო საჩივრებს ზეპირი მოსმენის გარეშე განიხილავს.

არხის იურისტის, თამთა მურადაშვილის თქმით, აღნიშნულ საქმეზე მიმდინარე დავა წმინდა სამართლებრივი რომ ყოფილიყო, პირველ ინსტანციაში სულ სხვა გადაწყვეტილებას მიიღებდნენ:

"ამ ლოგიკიდან გამომდინარე, სამართლებრივად არსებობს იმის მოლოდინი, რომ შესაძლოა გადაწყვეტილება არ იყოს სამართლიანი და დადგეს სიტყვისა და თავისუფლების საწინააღმდეგო. მაგრამ გარკვეული პროცენტით ეს არის, რომ უზენაეს სასამართლოს მოსამართლეებს, რომელთაც ამხელა ტვირთი აწევთ და პასუხისმგებლობა, გვაქვს მათი პატიოსნებისა და პროფესიული ღირსების იმედი".

სასამართლოს მიერ 21 ნოემბერს მიღებული გადაწყვეტილება რუსთავი 2-ის საქმესთან დაკავშირებით ბოლო იქნება, რადგან შემდეგ არხის იურისტებს გადაწყვეტილების ქვეყნის ფარგლებში გასაჩივრება აღარ შეეძლებათ.