განახლება: სტატიის გამოქვეყნებიდან რამდენიმე წუთში [22:20, 16 აპრილი] ეს მენიუ მიუწვდომელი გახდა. შეტყობინებაში ნათქვამია, რომ სერვისი ჯერჯერობით არ არის აქტიური.

თუ თქვენს მობილურზე სპეციალურ ნომერს აკრეფთ და მითითებებს მიჰყვებით (შეიყვანთ პირად ნომერს და დაბადების თარიღს), თქვენს ეკრანზე ახალი ფუნქციონალი გამოჩნდება, რომელსაც, შესაძლოა, მთავრობა ტესტავდეს.

სურათზე, რომელიც ფეისბუქზე ვრცელდება, წერია:

აირჩიეთ გადაადგილების მიზნობრიობა

1. სურსათი (2 საათი)
2. აფთიაქი (1 საათი)
3. ფულის ჩასარიცხად (30 წუთი)
4. გასეირნება (20 წუთი)
5. ცხოველის გასეირნება (20 წუთი).

სისტემა რომ მზად არ არის იქიდანაც ჩანს, რომ ყველა ნაბიჯის გავლის შემდეგ საპასუხო ტექსტში ნათქვამია, რომ "ფიქსირდება დროებითი ტექნიკური შეფერხება"

ჯერჯერობით მოქალაქეებს არ აქვთ ვალდებულება, რომ სახლიდან გასვლის წინ რაიმე ტიპის ნებართვა მოიპოვონ, თუმცა მსგავსი USSD-მენიუ შეიძლება სრული კარანტინის შემთხვევაში გახდეს საჭირო.

On.ge ცდილობს ინფორმაციის გადამოწმებას და სტატია მალე განახლდება.

განახლება: On.ge-ს მთავრობის ადმინისტრაციაში უთხრეს, რომ განიხილება შესაძლებლობა, მოქალაქეებმა უკვე არსებული ცხელი ხაზიდან ინფორმაცია მიიღონ მოკლე ტექსტური შეტყობინებებითაც.

"განიხილება შესაძლებლობა, მოქალაქეებმა 144-ის მეშვეობით, ინფორმაცია მიიღონ მოკლე ტექსტური შეტყობინების სახითაც. ერთიანი სამთავრობო ცხელი ხაზის ეს კონკრეტული ფუნქცია საჭირო გახდება იმ შემთხვევაში, თუ მიღებული იქნება გადაწყვეტილება საქართველოს მთელს ტერიტორიაზე სრული კარანტინის გამოცხადების შესახებ. ეს კი მოხდება იმ შემთხვევაში, თუ მოქალაქეები ზედმიწევნით არ შეასრულებენ დაწესებულ შეზღუდვებს", — ამბობენ ადმინისტრაციაში.

ამავე თემაზე: