ბრიტანეთს მიაჩნია, რომ მსოფლიო ჯანდაცვის ორგანიზაციას (WHO) კორონავირუსთან ბრძოლაში მნიშვნელოვანი როლი აქვს. ამის შესახებ ინფორმაციას CNN ბორის ჯონსონის სპიკერზე დაყრდნობით ავრცელებს. სპიკერის განცხადებით, არ არსებობს WHO-ს დაფინანსების შეწყვეტის გეგმა.

"კორონავირუსი არის გლობალური გამოწვევა და მნიშვნელოვანია, რომ ქვეყნებმა იმოქმედონ ერთად, ამ საერთო საფრთხის დასაძლევად. ის, თუ როგორ დავაფინანსებთ ჩვენ WHO-ს არ ემყარება სხვა ქვეყნების შემოწირულობებს" — განაცხადა პრესსპიკერმა.

კვირის დასაწყისში ბრიტანეთმა განაცხადა, რომ ჯანდაცვის ორგანიზაციას დასახმარებლად 81 მილიონ დოლარს გადაურიცხავდა.

სამშაბათს, 14 აპრილს, დონალდ ტრამპმა განაცხადა, რომ აშშ ჯანდაცვის მსოფლიო ორგანიზაციის დაფინანსებას დროებით წყვეტს.

ტრამპის თქმით, დაფინანსება 60-90 დღის განმავლობაში შეწყდება, ამ დროის განმავლობაში ისინი კორონავირუსის მიმართ ჯანდაცვის მსოფლიო ორგანიზაციის პასუხს გააანალიზებენ და შეაფასებენ. ტრამპმა WHO-ს კრიზისის "უკიდურესად ცუდად მართვაში და საფრთხის დამალვაში" დასდო ბრალი.

დონალდ ტრამპის გადაწყვეტილებას გამოეხმაურა, გაეროს გენერალური მდივანი, ანტონიო გუტიერეშიც და თქვა, რომ ახლა ჯანდაცვის მსოფლიო ორგანიზაციისთვის რესურსების შემცირების დრო არ არის.

გაეროს გენერალური მდივნის განცხადებით, ახლა კორონავირუსის წინააღმდეგ საერთო გლობალური ბრძოლის დროა.