ექსპრეზიდენტი მიხეილ სააკაშვილი საქართველოს მთავრობის პასუხს პასუხობს და აცხადებს, რომ ისევ შეუძლია მოქალაქეების საზღვარგარეთიდან ჩამოყვანა, თუ ამის საშუალებას მისცემენ. ის აკრიტიკებს ხელისუფლებას და ამტკიცებს, რომ ხალხის დასაბრუნებლად ყველაფერს არ აკეთებენ.

"მინდა მივმართო საქართველოს მთავრობას: ბიჭო, რა საპირველაპრილო ხუმრობა და ტყუილი მოუწყეთ ჩვენს ხალხს. საელჩომ გამოუცხადა, რომ ბილეთები გაიყიდებოდა იაფად, მივიდნენ აეროპორტში და აღმოჩნდა, რომ მარტო 25 ბილეთი გაიყიდა და დანარჩენი ნაცნობობით გადანაწილდა თქვენს ახლობლებზე, ნათესავებსა და მეგობრებზე. რას დასცინით ხალხს", — ამბობს ისე ვიდეომიმართვაში, რომელიც ფეისბუქგვერდზე გამოაქვეყნა.

მისი თქმით, გუშინ, 31 მარტს ვარშავიდან ჩანიშნული ჰქონდათ უკრაინული ავიაკომპანიის რეისი, რომელსაც ქვეყანაში 190-მდე ადამიანი უნდა დაებრუნებინა უფასოდ. ის არ აკონკრეტებს შესრულდა თუ არა, ან რატომ ჩაიშალა ეს რეისი. თუმცა აღნიშნავს, რომ შეთავაზება ისევ ძალაშია და მთავრობისგან მხოლოდ ნებართვა სჭირდებათ, რომ თბილისი აეროპორტში დაჯდომის უფლება მისცენ.

"საერთოდ, მზადა ვარ თვითმფრინავებით ევროპიდან ჩამოვიყვანო 5 000 ადამიანი. მოველაპარაკები კარანტინზე. კარანტინი არაფერი არ დაგიჯდებათ, პირდაპირ მივიყვან აეროპორტიდან სასტუმროებში, ექიმების მეთვალყურეობის ქვეშ და იქ იქნებიან 2 კვირა, რომ არავის შეუქმნან საფრთხე", — აცხადებს ის.

სააკაშვილი ამბობს, რომ ეს ხალხი გაუსაძლის პირობებშია და მათ დახმარება სჭირდება. ის მიმართვს ემიგრანტებს, რომ "გამოაფხიზლონ მთავრობა" და გაუგზავნონ წერილები, მოსთხოვონ საელჩოებს, რომ დაუშვან ეს რეისები.

"უბრალოდ, ივანიშვილი თავისი ხუშტურების გამო, ამის უფლებას არ აძლევს გახარიას. მოვხსნათ საკითხი და ყველაფერი გამოგვივა", — განაცხადა მან.

სააკაშვილმა მთავრობას ხალხის დასაბრუნებლად დახმარება აქამდეც შესთავაზა, თუმცა პასუხად მიიღო, რომ "მავნებლობას თავი დაანებოს". გარდა ამისა, საგარეო საქმეთა სამინისტრომ და საელჩოებმა მოუწოდეს საზღვარგარეთ მყოფ მოქალაქეებს, რომ არ ენდონ გარეშე პირების დაპირებებს და გაითვალისწინონ, რომ ქვეყანაში დაბრუნება, მხოლოდ მთავრობის დანიშნული რეისებითაა შესაძლებელი.