დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიერ-მინისტრის ინფორმაციით, სახელმწიფო მოახდენს ყველა იმ ადამიანების იდენტიფიცირებას, ვინც კორონავირუსის პანდემიის გამო სამსახური დაკარგა.

"გვექნება სპეციალური ღონისძიებები მათი პირდაპირი დახმარებისთვის", — თქვა გიორგი გახარიამ.

თუმცა, მას არ დაუკონკრეტებია, რა დახმარება იგულისხმება ამაში და არც ვადებზე უსაუბრია.

პრემიერ-მინისტრმა მთავრობის ადმინისტრაციაში გამართული შეხვედრის დროს ასევე თქვა, რომ ახლა უკიდურესად მნიშვნელოვანია ბიუჯეტში მობილიზებული თითოეული ლარის მაქსიმალურად რაციონალურად გამოყენება.

"ჩვენი მიზანია გავუმკლავდეთ ვირუსს ისე, რომ ეკონომიკას დარჩეს სწრაფი ზრდის პოტენციალი, ზიანი და სამუშაო ადგილების დანაკარგი იყოს მინიმალური", — აღნიშნა მან.

გახარიას თქმით, ხარჯების შემცირებაზე საუბარი გაგრძელდება, თუმცა კონკრეტული და მაღალი ხარისხის პროგნოზების გაკეთება ამ ვითარებაში რთულია.

დღეს ცნობილი გახდა, რომ ეკონომიკის დახმარებისთვის 2 მილიარდი ლარი გამოიყოფა, ასევე, მარტში, აპრილსა და მაისში კომუნალური გადასახადები დაუფინანსდებათ იმ მოქალაქეებს, რომლებიც თვის განმავლობაში 200 კილოვატზე ნაკლებ ელექტროენერგიას და ასევე, 200 მ3-ზე ნაკლებ ბუნებრივ აირს მოიხმარენ.

ამ დროისთვის საქართველოში კორონავირუსის 115 დადასტურებული შემთხვევაა, აქედან 22 ადამიანი გამოჯანმრთელდა. კარანტინის რეჟიმში იმყოფება 5783 პირი, ხოლო სტაციონარში მეთვალყურეობის ქვეშ — 301.