მადრიდში, სავაჭრო ცენტრში მდებარე სასრიალო მოედანი დროებით მორგად გადაკეთდება, რათა ქალაქი მოულოდნელად მომატებულ სიკვდილიანობას გაუმკლავდეს. ამის შესახებ ესპანური გამოცემა El Mundo წერს.

მადრიდის მერიის წარმომადგენლის თქმით, სავაჭრო ცენტრ Palacio de Hielo-ში განთავსებულ სასრიალო მოედანს, რომელიც 1800-მდე მოციგურავეს იტევს, "ცხედრების შესანახად" გამოიყენებენ.

23 მარტს მადრიდის მერიამ განაცხადა, რომ ქალაქის 14 სასაფლაო ვეღარ შეძლებდა ცხედრების მიღებას, რადგან იქ მომუშავე პერსონალს შესაბამისი აღჭურვილობა არ ჰქონდა.

"ეს დროებითი ღონისძიებაა, რომელიც შექმნილი სიტუაციის განმუხტვაში უნდა დაგვეხმაროს. ქალაქის დამკრძალავი ბიუროები გადატვირთულია", - ნათქვამია მადრიდის მერიის განცხადებაში.

სავაჭრო ცენტრი მადრიდის ჩრდილოეთში, უბან ჰორტალეზაშია განლაგებული, არც ისე შორს ახალი კონგრეს ცენტრისგან, რომელიც 5 500 საწოლისგან შემდგარ საველე საავადმყოფოდ გადააკეთეს.

ესპანეთში კორონავირუსის 39 673 შემთხვევაა გამოვლენილი, დაღუპულთა რიცხვი კი 2 696-ია.