კორინავირუსის გავრცელების თავიდან ასარიდებლად ყველა პასუხისმგებლობის მქონე ადამიანი ცდილობს, რომ პირისპირ კომუნიკაციას თავი აარიდოს. როგორც იცით, საზოგადოების დიდი ნაწილი თვითიზოლაციაშია.

მუსიკოსები კონცერტებს აუქმებენ, მათი ნაწილი კი ონლაინ პლატფორმების გამოყენებაზე გადადის. ჯონ ლეჯენდმა და Coldplay-მ გადაწყვიტეს კორონავირუსისგან გამოწვეული სტრესი ხალხს ოდნავ მაინც შეუმსუბუქონ.

ბენდის წამყვანი ვოკალისტი, კრის მარტინი,რამდენიმე სიმღერის შესრულებას ინსტაგრამზე გეგმავს. დასწრება აბსოლუტურად ყველა მსურველს სრულიად უფასოდ შეუძლია. მთავარია ინტერნეტი გქონდეთ.

ინიციატივის შესახებ, კრის მარტინმა ტვიტერზე დაწერა:

"გამარჯობა, დიდი იმედი მაქვს რომ ყველანი კარგად ხართ. თუ ვინმე ლაყბობისა და მუსიკის მოსმენის ხასიათზეა, Coldplay-ს ინსტაგრამზე პირდაპირ ეთერში გავალ", — მომღერალმა ტვიტს ჰეშთეგად #TogetherAtHome გაუკეთა (ყველა ერთად ვიყოთ სახლში).

ინიციატივას გამოეხმაურა ჯონ ლეჯენდი, რომელმაც მარტინის იდეას ხოტბა შეასხა და გადაწყვიტა, მონაწილეობა თავადაც უნდა მიეღო:

"ჩემი კარგი მეგობარი კრის მარტინი, დღეს სახლიდან კონცერტს გამართავს. მეც ჩავერთვები ინსტაგრამზე. #TogetherAtHome", — ლეჯენდი ტვიტერზე თავის ფანებს ჰპირდება, რომ თხოვნას ყველას შეუსრულებს და მათ საყვარელ სიმღერებს იმღერებს. თბილისის დროით ლეჯენდის ჩართვა ღამის 12 საათზე დაიწყება.

ლეჯენდი მოწადინებულია, რომ ინიციატივა სხვა მომღერლებმაც აიტანოც. სწორედ ამიტომ, თავის გამომწერებს თხოვა, რომ სხვა საყვარელი არტისტებისთვისაც მიეწვდინათ ხმა.