პრემიერ-მინისტრის, გიორგი გახარიას განცხადებით, ლარის კურსის ვარდნაზე გავლენა იქონია პანდემიასთან დაკავშირებულმა გამოწვევებმა. მისი თქმით, ეკონომიკური გუნდი მუშაობს ამ საკითხზე და დარწმუნებული არის, რომ ლარის კურსი შესაბამის საბალანსო ნიშნულს დაუბრუნდება.

"ლარის კურსი ბოლო რამდენიმე კვირის განმავლობაში საკმაოდ სტაბილურად და პოზიტიურად მოძრაობდა. რა თქმა უნდა, ეს არის ბოლო გამოწვევების, პანდემიასთან დაკავშირებულ გამოწვევებზე რეაქცია. ეს არის რეაქცია, რომელიც ჩვენ, ყველამ ერთად, წყნარად, მშვიდად უნდა გადავიტანოთ. ამისთვის ჩვენ დღეს გვექნება საუბარი ეროვნულ ბანკთანაც და საფინანსო სექტორთანაც", — განაცხადა პრემიერმა.

ეროვნული ბანკის 13 მარტის გაცვლითი კურსით, ლარი დოლართან 7 თეთრით, ხოლო ევროსთან კი 5 თეთრით გაუფასურდა. 13 მარტიდან ერთი ევროს ოფიციალური ღირებულება 3,3145 ლარი, ხოლო ერთი დოლარის ფასი 2,9494 ლარი იქნება.

11 მარტს ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად გამოაცხადა. საქართველოში კორონავირუსით ინფიცირების 25 შემთხვევაა დადასტურებული.