ტელეკომპანია იბერიას სამაუწყებლო ლიცენზიის საქმეზე იუსტიციის ყოფილ მინისტრი ზურაბ ადეიშვილი და მისი მოადგილე გიორგი ლაცაბიძე სასამართლომ დამნაშავედ ცნო. ადეიშვილს სასჯელის სახედ 2-წლიანი პატიმრობა მიესაჯა, რაც ამნისტიის კანონით 1/4-ით შეუმცირდა და ჯამში 1.6 წელი განესაზღვრა. მის მოადგილეს კი 40 000 ლარიანი ჯარიმა დაეკისრა და 2 წლით და 3 თვით ჩამოერთვა თანამდებობის დაკავების უფლება.

ამ საქმეზე ადეიშვილსა და ლაცაბიძეს ბრალი 2016 წელს უფლებამოსილების გადამეტებისთვის წაუყენეს. გამოძიების ინფორმაციით, 2004 წელს, გენერალური პროკურორობის დროს ადეიშვილმა ომეგა ჯგუფის კუთვნილი კომპანიის, იბერია ტივის სამაუწყებლო ლიცენზიის ხელში ჩაგდება გადაწყვიტა და მოადგილესთან ერთად დანაშაულებრივი გეგმა შეიმუშავა.

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი.

2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა. ადეიშვილი ქვეაყანში არ იმყოფება და მას სასჯელი არ მოუხდია.