ორგანიზაცია ადამიანის უფლებების სწავლებისა და მონიტორინგის ცენტრი (EMC) აცხადებს, რომ მსჯავრდებულ დეკანოზ გიორგი მამალაძისთვის ციხის ადმინისტრაციას საქალაქო სასამართლოს პროცესზე გადაყვანა არ შეუთავაზებია. მათივე ცნობით, შესაბამისი ინფორმაცია პენიტენციური სამსახურიდან მიიღეს.

ე.წ. ციანიდის საქმეზე მსჯავრდებულ გიორგი მამალაძისთვის ჯანმრთელობის მდგომარეობის გამო სასჯელის გადავადების სხდომა 27 თებერვალს, საქალაქო სასამართლოში უნდა გამართულიყო. პროცესი ციხეში ჩასატარებლად 5 მარტს, 11 საათისთის გადაიდო.

საქალაქო სასამართლოში განხილვის დაწყებისას მოსამართლემ წაიკითხა წერილი პენიტენციური სამსახურიდან, სადაც მითი თქმით ეწერა, რომ მსჯავრდებულს "თავად არ სურს პროცესზე მოსვლა" და პატიმარი "საკუთარი სურვილით მუდმივად მწოლიარე მდგომარეობაშია".

მსჯავრდებულის უფლებადამცველი ორგანიზაცია აცხადებს, რომ მათთის პენიტენციური სამსახურის განმარტება მოულოდნელი აღმოჩნდა. სასამართლო პროცესის დაწყებამდე EMC-ის წარმომადგენლისთვის ცნობილი იყო რომ პენიტენციური სამსახური ვერ ახერხებდა დეკანოზის ეტაპირებას.

EMC-ის შეფასებით, პენიტენციური სამსახურის განმარტება გარკვეულწილად ბუნდოვანია, რამდენადაც სამსახური ერთი მხრივ მიუთითებს, რომ მამალაძე საკუთარი ინიციატივით იმყოფება მწოლიარე მდგომარეობაში, მეორე მხრივ კი სასამართლოს სთხოვს მსჯავრდებულის ინტერესების დაცვის მიზნით სასამართლო სხდომა პენიტენციურ დაწესებულებაში გაიმართოს:

"მსგავსი განმარტების პირობები კი ჩნდება ეჭვი, რომ პენიტენციურ სამსახური ცდილობს, მსჯავრდებულის ინტერესების დაცვის მოტივით თავი აარიდოს გ. მამალაძის საქმის საჯაროდ განხილვას".

დეკანოზის ძმა, თორნიკე მამალაძე აცხადებს, რომ ეს მიზანმიმართულად ხდება, რათა სხდომა საჯარო არ იყოს და მისი ძმის მდგომარეობა საზოგადოებამ ვერ ნახოს. ოჯახი აცხადებს, რომ გიორგი მამალაძის ჯანმრთელობის მდგომარეობა მძიმეა და მათ მკურნალობის საშუალება არ ეძლევათ.

სასჯელის გადავადების შესახებ შუამდგომლომაში EMC ასაბუთებს სტრესისგან თავისუფალ, უსაფრთხო გარემოში დეკანოზის გადაყვანის მნიშვნელობას მისი მკურნალობისთვის, რაც ფსიქოსომატური დაავადების მიზეზის შეცვლისა და მისთვის ადეკვატური და კომპლექსური მკურნალობის მიღების შესაძლებლობას შექმნის.