აუდიტის სამსახურის ხელმძღვანელის, ლაშა თორდიას პირველ მოადგილედ ნინო ლომჯარია დანიშნეს. ლომჯარია აღნიშნულ თანამდებობაზე თავად თორდიამ წარადგინა:

"ნინო მთელი ამ ხნის განმავლობაში დიდ როლს ასრულებდა ისეთ საქმეებში, როგორიც არის წინასაარჩევნო სისტემის შექმნა, ანტიკორუფციული გარემოს ფორმირება, გამჭვირვალე სისტემების ფორმირება საქართველოში. შესაბამისად, მისი ცოდნა, გამოცდილება, რეპუტაციას არის პირდაპირ თანხვედრაში აუდიტის სამსახურის მიზნებისა და ამოცანებისთვის. ჩვენ გვქონდა კონსულტაციები დიდი ხნის განმავლობაში ნინოსთან და მან მიიღო გადწყვეტილება, რომ შეერთებოდა ჩვენს გუნდს".

როგორც თავად ლომჯარიამ განაცხადა, რომ დღეს აუდიტის სამსახური ქვეყანაში ერთ-ერთი ყველაზე გამჭვირვალე და პროგრესირებადი დაწესებულებაა:

"მისი მიღწევები აღიარებული არის არა ერთი ადგილობრივი თუ საერთაშორისო ავტორიტეტული ორგანიზაციების მიერ. ეს გარემოებები იყო საფუძველი იმისა, რომ მივიღე ეს შემოთავაზება. წლების განმავლობაში საჯარო უწყებების გამჭვირვალობა და ანტიკორუფციული საქმიანობა იყო არასამთავრობო სექტორში ჩემი საქმიანობის ერთ-ერთი მთავარი მიმართულება და დღეს უკვე საჯარო მოხელის სტატუსით, დიდი სურვილი მაქვს, რომ აუდიტის სამსახურის ინსტიტუციურ გაძლიერებაში მივიღო მონაწილეობა".

ჰაინრიხ ბიოლის ფონდის ინფორმაციით, ნინო ლომჯარია იყო ISFED-ის აღმასრულებელი დირექტორი, რის შემდეგაც ამავე ორგანიზაციაში სხვა პოზიციაზე გააგრძელა მუშაობა. 2006 წელს მიღებული აქვს თსუ-ს მაგისტრის ხარისხი სამართალმცოდნეობაში, 2011 წელს კი - სენტ ლუისში ვაშინგტონის უნივერსიტეტის სამართლის მაგისტრის ხარისხი.

გარდა ამისა, 2015 წლიდან არის ევროპული საერთაშორისო სადამკვირვებლო ქსელის, ENEMO-ს გენერალური მდივანი. ამასთან, 2014 წლიდან ლომჯარია ევროპული სადამკვირვებლო ორგანიზაცია - EPDE-ს გამგეობის წევრიცაა.

სხვადასხვა წლებში ახალგაზრდა იურისტთა ასოციაციაში მუშაობდა. 2010 წელს იგი ვაშინგტონის უნივერსიტეტის სამართლის პროფესორის კვლევის ასისტენტის პოზიციას იკავებდა. ამასთან, ლომჯარია არის 15 კვლევის ავტორი არჩევნების მონიტორინგის, საჯარო ინფორმაციის ხელმისაწვდომობის, მედია გამჭვირვალობისა და ანტი კორუფციულ საკითხებზე.