2005 წლის 24 მარტიდან 2013 წლის 16 მაისამდე 9 სეზონისა და 201 ეპიზოდის განმავლობაში გადიოდა ერთ-ერთი ყველაზე ცნობილი სიტკომი The Office. სულ მალე კი ეს საკულტო შოუ ახალ სიცოცხლეს შეიძენს.

ოფისის გულშემატკივრებს სიტკომის გაგრძელების მრავალგვარ შესაძლებლობაზე უფიქრიათ, მაგრამ, ალბათ, არასდროს წარმოუდგენიათ ის საბავშვო წიგნის სახით.

დიახ, წელს შოუს გამოსვლიდან 15 წელი სრულდება და საკულტო პერსონაჟების ახალი ისტორიების გაცნობა საბავშო წიგნის საშუალებითაც შეგვეძლება.

ოფისი: ერთი დღე დანდერ მიფლინის დაწყებით სკოლაში — ასე ჰქვია მომავალ წიგნს, რომელიც რობ პერლმენმა დაწერა, ილუსტრაციებით კი მელანი დემერმა გააფორმა.

ამის შესახებ ინფორმაცია თავად შოუს ტვიტერის ოფიციალურ ანგარიშზე გამოქვეყნდა:

აქამდე შესაძლოა მაყურებლებს ბევრნაირად აღეწერათ ამ სიტკომის ერთ-ერთი მთავარი გმირი, მაიკლ სკოტი, თუმცა, ალბათ, ძალიან ცოტა თუ იტყოდა მასზე, საყვარელიაო.

აი, ახლა კი, როცა ამ მართლაც საოცარ ილუსტრაციაზე მხატვრის მიერ წარმოდგენილ მის ბავშვურ ვერსიას იხილავთ, აღარავის გაუჭირდება ამის თქმა.

მას შემდეგ, რაც 2018 წელს შოუ ნეტფლიქსის პლატფორმაზე გამოჩნდა, ის უამრავმა მაყურებელმა აღმოაჩინა ხელახლა, თუმცა ამ ახალი წიგნის საშუალებით ოფისს პატარა გულშემატკივრების დიდი არმია შეემატება.

წიგნი 4-8 წლის ბავშვებისთვისაა განკუთვნილი, თუმცა მისი წაკითხვით, ალბათ, ამ სიტკომის ნებისმიერი ასაკის გულშემატკივარი მიიღებს დიდ სიამოვნებას.

წიგნი 6 ოქტომბრიდან გაიყიდება, თუმცა მისი წინასწარ შეკვეთა ამაზონიდან უკვე შეგიძლიათ.