დეკანოზ გიორგი მამალაძისთვის სასჯელის გადავადებასთან დაკავშირებით, ხვალ 27 თებერვალს თბილისის საქალაქო სასამართლოში იმსჯელებენ. ამის შესახებ ინფორმაციას ადამიანის უფლებების სწავლებისა და მონიტორინგის ცენტრი (EMC) ავრცელებს. სასამართლოს EMC-მ მიმართა და მამალაძის ჯანმრთელობის მძიმე მდგომარეობის გათვალისწინებით, სასჯელის გადავადება მისი ჯანმრთელობის გაუმჯობესებამდე ითხოვა.

ორგანიზაციის განმარტებით, მამალაძის ჯანმრთელობის მდგომარეობა კვალიფიციურმა ექსპერტებმა რამდენიმეჯერ შეაფასეს და ექსპერტიზის დასკვნებში პირდაპირ არის მითითებული, რომ სწორედ საპატიმრო პირობები გახდა მამალაძის ტრავმის მასტიმულირებელი.

"განსაკუთრებით მნიშვნელოვანია 2019 წლის დეკემბერში დამოუკიდებელი ექსპერტების მიერ წამებისა და სასტიკი მოპყრობის მიმართ სამედიცინო ექსპერტიზის ჩატარების სახელმძღვანელო პრინციპებზე დაყრდნობით მომზადებული ექსპერტიზის დასკვნა, რომლის თანახმადაც მამალაძის ჯანმრთელობის მდგომარეობა გაუარესებულია და საჭირო მკურნალობის მიუღებლობის შემთხვევაში, ინვალიდიზაციის სერიოზული რისკი არსებობს", — ნათქვამია ორგანიზაციის განცხადებაში.

სასჯელის გადავადების შესახებ შუამდგომლომაში EMC ასაბუთებს სტრესისგან თავისუფალ, უსაფრთხო გარემოში დეკანოზის გადაყვანის მნიშვნელობას მისი მკურნალობისთვის, რაც ფსიქოსომატური დაავადების მიზეზის შეცვლისა და მისთვის ადეკვატური და კომპლექსური მკურნალობის მიღების შესაძლებლობას შექმნის.