საზოგადოებრივი მაუწყებლის აჭარის ტელევიზიისა და რადიოს ჟურნალისტმა, ნინო ხოზრევანიძემ არხი დატოვა. ამის შესახებ მან მაუწყებლის დირექტორს აცნობა და მიზეზებიც განუმარტა.

On.ge გთავაზობთ მისი წერილის შინაარსს უცვლელი სახით:

ფოტო: ნინო ხოზრევანიძე

"ბატონო გიორგი, რომ ვფიქრობდე გაუაზრებლად აზიანებთ მაუწყებელს, თქვენთან დალაპარაკებას ვცდიდი, მაგრამ დღითიდღე ვრწმუნდები, როგორ მიზანმიმართულად, ნაბიჯ-ნაბიჯ ანგრევთ, ანადგურებთ მაუწყებლის იდეას. პროცესები იმდენად შეუქცევადია, რომ აზრს ვეღარ ვხედავ დავრჩე ხელფასისთვის, თქვენს ქუდქვეშ ყოფნა მიუღებელია ჩემთვის.

21 თებერვალს ვნახეთ, როგორ მოარგეთ კონკურსი ბაკალავრის დიპლომის მქონე ვახო ხუზმიაშვილს, რომლის დანიშვნაზეც წინასწარ ვიცოდით. 20 თებერვალს განვითარებული მოვლენები კი სცდება ყოველგვარ მორალურ ზღვარს.

მაუწყებლის ნგრევის პროცესში, რომელიც ნათია კაპანაძის იმპიჩმენტით დაიწყო და ნათია ზოიძის იძულებით წასვლით გაგრძელდა, იცით, რომ თქვენ ხართ რიგითი შემსრულებელი. გახსოვდეთ, რომ ყველაფერი დროებითია და თქვენი ქმედებებისთვის პასუხისგება მოგიწევთ", — დაწერა ნინო ხოზრევანიძემ წერილში, რომელიც გიორგი კოხრეიძეს გაუგზავნა და სთხოვა ხელშეკრულების შეწყვეტა.

აჭარის მაუწყებელში ქართული ოცნების მიერ დაკომპლექტებული მრჩევლებისგან არჩეული გიორგი კოხრეიძის ტელევიზიაში მისვლის შემდეგ თანამშრომელთა ეჭვები გამართლდა. არხის დპირექტორის პირველ მოადგილეს, ნათია ზოიძეს უფლებები შეუზღუდეს, რის გამოც მან თანამდებობა დატოვა. მოგვიანებით დაანონსდა, რომ შეიცვლებოდა მთავარი საინფორმაციო გამოშვების პროდიუსერი და დირექტორმა კვლავ ქართული ოცნებისგან დანიშნული მრჩევლების დახმარებით მაია მერკვილაძეს სხვა თანამდებობა შესთავაზა.