ჩინეთიდან ჩამოყვანილი საქართველოს 34 მოქალაქე ორკვირიან საკარანტინო პერიოდს საჩხერეში გაივლის. ისინი საჩხერის სამედიცინო ცენტრის მიმდებარედ, სასტუმროში განათავსეს. მათ შორის 24 ქალი, 8 კაცი და ორი ბავშვია.

დაავადებათა კონტროლის ცენტრის დირექტორის, ამირან გამყრელიძის განცხადებით, მათი ინფორმაციით, ამ მოქალაქეების ნაწილს შესაძლოა ჰქონოდა შეხება კორონავირუსით ინფიცირებულ პირებთან, ამიტომ მსგავსი ღონისძიება პრევენციისთვის არის საჭირო.

ინფექციური საავადმყოფოს დირექტორის, თენგიზ ცერცვაძის განმარტებით, საქართველოს მოქალაქეებმა ქვეყანაში დაბრუნება სიფრთხილის მიზნით გადაწყვიტეს.

"არის იმის ალბათობა, რომ მათგან არც ერთი არ მოხვდეს ჩვენს კლინიკაში. მომზადებულია საკარანტინო სივრცე... ჩვენთან მათგან მოხვდებიან მხოლოდ ის პირები, რომელთაც ჩამოსვლის მომენტში ექნებათ ის სიმპტომები და ნიშნები, რომელიც განსაზღვრულია მსოფლიო ჯანდაცვის ორგანიზაციის მიერ და რომლითაც ჩვენ ვხელმძღვანელობთ", — განაცხადა მან.

საგარეო საქმეთა სამინისტროში განმარტავენ, რომ ეს არ იყო საქართველოს მოქალაქეების ევაკუაცია კორონავირუსის საფრთხის გამო. მათი განმარტებით, ქვეყანაში ჩამოვიდნენ ის მოქალაქეები, რომელთაც ძვირიანი ბილეთების ყიდვის საშუალება არ ჰქონდათ და ერთ-ერთ კომპანიას მათ ჩამოყვანაში დახმარება სთხოვეს.