ექსპრეზიდენტი მიხეილ სააკაშვილი თანაგუნდელისა და ყოფილი პრემიერის, ვანო მერაბიშვილის გათავისუფლებას და მის სამომავლო გეგმებს გამოეხმაურა. სააკაშვილის თქმით, ეთანხმება მერაბიშვილს, რომ ივანიშვილის ხელსუფლება დასრულდება და შერიგების აუცილებლობას გაუსვა ხაზი.

"მოვუწოდებ ყველას შერიგებისკენ, არა წარსული, არამედ მომავლის სწორებისკენ", — წერს ის.

ციხის დატოვების შემდეგ მერაბიშვილმა განაცხადა, რომ ჯერ არ გადაუწყვეტია, რომელ პარტიაში გააგრძელებს პოლიტიკურ კარიერას, რადგან მისი ყოფილი თანაგუნდელები ამჟამად ნაციონალურ მოძრაობასა და ევროპულ საქართველოში არიან გადანაწილებული. მისი თქმით, გაივლის კონსულტაციებს და გადაწყვეტილებას ამის შემდეგ მიიღეს. გარდა ამისა, მერაბიშვილმა არ უპასუხა ჟურნალისტების კითხვას, შეხვდება თუ არა მიხეილ სააკაშვილს.

• გავაგრძელებ ბრძოლას, რომ ეს რეჟიმი წელსვე ჩამოშორდეს საქართველოს — ვანო მერაბიშვილი
• ამ ხელისუფლების დამხობის შემდეგ, ამ ციხის კარები ფართოდ გაიღება და ყველა პოლიტპატიმარი გათავისუფლდება — მერაბიშვილი
• ყველაფერს გავაკეთებ იმისათვის, რომ პოლიციის ღირსება აღდგეს — მერაბიშვილი

ვანო მერაბიშვილის საქმე

მერაბიშვილმა ციხე 6 წლისა და 9 თვიანი პატიმრობის შემდეგ დატოვა. ის 2013 წლის მაისში მითვისება-გაფლანგვისა და ამომრჩევლის მოსყიდვის ბრალდებით დააკავეს. მოგვიანებით, მას სხვა ბრალდებებიც წაუყენეს — 2011 წლის 26 მაისის აქციისა და სანდრო გირგვლიანის მკვლელობის საქმეებზე უფლებამოსილების გადამეტების მუხლებით. მერაბიშვილი 2014 წელს სასამართლომ დამნაშავედ სცნო და პატიმრობა მიუსაჯა.

ამჟამად საქალაქო სასამართლოში მერაბიშვილს 7 ნოემბრის აქციის დარბევისა და იმედში შეჭრის საქმეზე უფლებამოსილების გადამეტებას ედავებიან. მისი ადვოკატის, ოთო კახიძის განმარტებით, ამ საქმეზე გამტყუნების შემთხვევაშიც კი, უკვე მოხდილი წლები ამეტებს ახალ შესაძლო სასჯელს და მერაბიშვილს ამის გამო ვერ დაიჭერენ.

ვანო მერაბიშვილის საქმეზე სტრასბურგის დიდმა პალატამ დაადგინა ევროკონვენციის მე-18 მუხლის დარღვევა, მე-5 მუხლთან ერთად.

"სასამართლომ დაასკვნა, რომ მერაბიშვილის წინასწარი პატიმრობა მისი ქართული პოლიტიკიდან ჩამოშორებას არ ისახავდა მიზნად. მიუხედავად ამისა, სასამართლომ დაადგინა, რომ მისი ბრალდებები, რაც წინასწარი პატიმრობის პერიოდში შუაღამით ციხიდან გაყვანასა და დაკითხვას უკავშირდებოდა, საკმარისად დამაჯერებელი და დადასტურებულია", —ნათქვამია ევროსასამართლოს განცხადებაში.

სტრასბურგის სასამართლოს დიდმა პალატამ საქმის განხილვა საქართველოს საჩივრის საფუძველზე დაიწყო. იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის 14 ივნისს გამოტანილი გადაწყვეტილება გაასაჩივრა. შესაბამისად, აღნიშნული ვერ შევიდა ძალაში აღსასრულებლად.

14 ივნისს, ევროპულმა სასამართლომ დაადგინა, რომ დაირღვა ადამიანის უფლებათა კონვენციის მე-18 მუხლი, მე-5 მუხლის პირველ ნაწილთან ერთად. მერაბიშვილის იმჟამიდელი ადვოკატი, ოთო კახიძე განმარტავდა, რომ კონვენციის მე-18 მუხლს მეხუთესთან ერთად ადგენენ მაშინ, როდესაც დისკრიმინაციული მოტივით ხდება პატიმრობის შეფარდება. კონვენციის მე-18 მუხლი უფლებების შეზღუდვათა გამოყენების ფარგლებს ეხება და ადგენს, რომ "ხსენებულ უფლებათა და თავისუფლებათა კონვენციით დაშვებული შეზღუდვები გამოიყენება მხოლოდ და მხოლოდ მათთვის გათვალისწინებული მიზნებისათვის".