დღეს, 14 თებერვალს დილით, რიკოთის საავტომობილო მაგისტრალის მშენებლობაზე, რომელსაც ჩინური კომპანია აწარმოებს, სამუშაო ობიექტი ჩამოინგრა. შემთხვევა უბისის მონაკვეთზე მოხდა.

როგორც On.ge-ს რეგიონული განვითარებისა და ინფრასტრუქტურის სამინისტროში განუცხადეს, შემთხვევის შედეგად ორი ადამიანი დაშავდა. ერთ-ერთ ერთი დაშავებული საავადმყოფოშია გადაყვანილი, მეორეს კი მსუბუქი დაზიანებები აღენიშნება.

უწყების ინფორმაციით, აღნიშნულ შენობა სასაწყობე ნაგებობა იყო, რომლის სახურავიც ჩამოვარდა.

ადგილზე იმყოფებიან რკინიგზელთა ახალი პროფკავშირის ლიდერები.

შინაგან სამინისტროს ცნობით, მომხდარზე გამოძიება სისხლის სამართლის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს. აღნიშნული მუხლი ისჯება ჯარიმით ან გამოსასწორებელი სამუშაოთი ანდა 2 წლამდე თავისუფლების აღკვეთით.