ფინანსთა სამინისტროს საგამოძიებო სამსახურის ინფორმაციით, არასრულწლოვნით ვაჭრობის — ტრეფიკინგის ბრალდებით ბავშვის დედა და კიდევ 6 პირი დააკავეს. უწყების ინფორმაციით, ბრალდებულებს შორის ორი ექიმია, დაკავებულთაგან ერთი კი წარსულში ამავე სახის დანაშაულზეა ნასამართლევი.

"გამოძიებით დადგენილია, რომ ბრალდებულებმა, პირადი მატერიალური გამორჩენის მიღების მიზნით, განიზრახეს გაეყიდათ არასრულწლოვანი, ხოლო მიღებული თანხა გაენაწილებინათ ურთიერთშორის. ბრალდებულებმა, აღნიშნული დანაშაულებრივი განზრახვით, მოიძიეს ბავშვის შეძენის მსურველი პირი, რომელსაც ბავშვის შეძენის სანაცვლოდ, მოსთხოვეს 13 000 დოლარი", — წერია განცხადებაში.

უწყების განმარტებით, დანაშაულის დაფარვის მიზნით, წინასწარი შეთანხმებით, ბავშვის დედა ფეხმძიმობის პერიოდში, შესაბამისი სამედიცინო პროცედურების გავლის და საავადმყოფოში მშობიარობის დროს, სხვა პირის სახელითა და გვარით დარეგისტრირდა. დაკავებულებმა ახალშობილი 6 თებერვალს გაყიდეს. ბავშვი ამ დროისთვის სახელმწიფო ზრუნვისა და ტრეფიკინგის მსხვერპლთა და დაზარალებულთა დახმარების სააგენტოს მეთვალყურეობის ქვეშაა.

გამოძიება საქართველოს სისხლის სამართლის კოდექსის 143² მუხლის მესამე ნაწილით მიმდინარეობს, რაც გულისხმობს ადამიანის ყიდვას ან გაყიდვას, ან მის მიმართ სხვა უკანონო გარიგების განხორციელებას, ორგანიზებული ჯგუფის მიერ, სამსახურებრივი მდგომარეობის გამოყენებით. დანაშაული 14-დან 17-წლამდე პატიმრობას ითვალისწინებს.